11.01.2025 | 11:33
Արտարժույթների փոխարժեքները՝ հունվարի 11-ի դրությամբ
«Լոռու մարզում բնակչության ամենամեծ ՝ 42% նվազումն է նկատվել». վիճակագրական կոմիտեի ներկայացուցիչ. ՏԵՍԱՆՅՈՒԹ
Հասարակություն
02.10.2019 | 12:22
1991 թվականից ի վեր՝ Հայաստանում բնակչության ամենամեծ նվազումը Լոռու մարզում է՝ շուրջ 42%: Լոռիին հաջորդում է Շիրակի մարզը: Այս մասին այսօր՝ «Հայաստանի սոցիալ-ժողովրդագրական վիճակի բարելավման հիմնախնդիրներն ու ռազմավարությունը» թեմայով քննարկման ընթացքում նշեց Հայաստանի Ազգային վիճակագրական ծառայության մարդահամարի և ժողովրդագրության բաժնի պետ Կարինե Կույումջյանը:
Նրա խոսքով՝ որոշ մարզերում բնակչության թվի նվազմանը զուգահեռ՝ վերջին 20 տարում Հայաստանի բնակչության շուրջ 400 հազար բնական հավելաճ է արձանագրվել:
«90-ականներից սկսած՝ Հայաստանում արձանագրվել է բնակչության թվաքանակի աստիճանական անկում, մասնավորապես՝ ի հաշիվ արտագաղթի նշանակալի աճի, բնակչության բնական հավելաճի նվազման և որպես դրանց հետևանք՝ բնակչության ժողովրդագրական ծերացման: Եթե 90-ականներին ծնելիության ամենաբարձր ցուցանիշները մարզերում էին, ապա այժմ այն բարձր է քաղաքային համայնքներում»,- ընդգծեց Կարինե Կույումջյանը:
Ըստ նրա՝ բնակչության վերարտադրության, ծնելիության, մահացության և դրանց հարաբերակցություններում տեղ գտած տեղաշարժերի, ինչպես նաև միգրացիայի հետևանքով 63 և բարձր տարիքի բնակչության մասնաբաժինը 2019 թվականի հունվարի 1-ի դրությամբ հատել է 14%-ի սահմանը:
«Այս առումով՝ Հայաստանը ժողովրդագրական ծերացման նախնական մակարդակից անցում է կատարել միջինի: 2019-ի կիսամյակային տվյալներով՝ 0-15 տարեկանները կազմում են ՀՀ բնակչության 21,5%-ը, 16-62 տարեկանները՝ 64,4%-ը»,- նշեց Կարինե Կույումջյանը:
Մասնագետն անդրադարձավ նաև Հայաստանում գրանցված ամուսնությունների թվին. «Օրինակ, 1991 թվականին՝ մեկ տարում գրանցվել էր 28 հազար ամուսնություն և 4000 ամուսնալուծություն, մինչդեռ 2018 թվականի ընթացքում գրանցված ամուսնությունների թիվը 14,5 հազար է»:
Մանրամասները՝ տեսանյութում:
Նելլի Մելքոնյան
