10.01.2025 | 20:00
ՀՅԴ-ն երբեք դեմ չի եղել ԵՄ-ի անդամ դառնալուն, 2017-ին է կնքվել CEPA-ն․ Քրիստինե Վարդանյան․ ՏԵՍԱՆՅՈՒԹ
Հայ-չինական հարաբերությունները աչքի են ընկնում փոխվստահության բարձր մակարդակով. Հայաստանում Չինաստանի դեսպան
Քաղաքականություն
27.09.2019 | 21:58
«Հայ-չինական հարաբերությունները պատմական արմատներ ունեն: 1992 թվականին երկու երկրների միջև դիվանագիտական հարաբերությունների հաստատումից հետո դրանք ավելի հաստատուն և կայուն դարձան: Քաղաքական դաշտում մեր հարաբերություններում ոչ մի խնդիր չկա. դրանք աչքի են ընկնում փոխվստահության բարձր մակարդակով, հաճախակի փոխադարձ այցերով»,- ասաց Թիան Էրլուն:
Դեսպանի խոսքով` երկու երկրների առևտրատնտեսական համագործակցությունն առանձնանում է վստահ ու կայուն զարգացմամբ: «Սկսած 2009 թվականից, Չինաստանը մնում է որպես երկրորդ առևտրային գործընկերը Հայաստանի համար: Նկատի ունեմ առանձին երկրների դեպքում, եթե վերցնենք Եվրամիությունը որպես մեկ ամբողջություն, ապա Չինաստանը երրորդն է: Փոխադարձ առևտրաշրջանառությունը Հայաստանի և Չինաստանի միջև կազմում է Հայաստանի արտաքին առևտրաշրջանառության գրեթե 10 կամ 11 տոկոսը: Հայաստանի վիճակագրության տվյալներով՝ 2019թ-ին՝ մինչև այս տարվա հուլիսն առևտրաշրջանառությունը կազմել է մոտավորապես 500 մլն ԱՄՆ դոլար»,-ներկայացրեց Թիան Էրլուն:
Նրա խոսքով` Հայաստանի և Չինաստանի միջև ակտիվ զարգանում է նաև հումանիտար համագործակցությունը: Չինաստանում և Հայաստանում կազմակերպվում են փոխադարձ մշակույթի օրեր, որոնց շրջանակում երկու երկրների հայտնի և լավագույն գեղարվեստական կոլեկտիվները հանդես են գալիս փոխադարձ ելույթներով` տարածելով իրենց մշակույթը:
Ըստ դեսպանի` քիչ չեն հաջողությունները նաև կրթության բնագավառում: «Հայաստանում հաջող գործում է Կոնֆուցիուսի ինստիտուտը: Մենք տեսնում ենք, որ հայ հասարակությունը, հատկապես երիտասարդները, շատ են հետաքրքրվում չինարենով: Անցյալ տարվանից այստեղ գործում է հայ-չինական բարեկամության դպրոցը»,-հիշեցրեց նա:
Թիան Էրլուն մեծ կարևորություն տվեց վիզաների ազատականացման միջպետական համաձայնագրին` նշելով, որ փոխադարձ այցերը տարեցտարի աճում են:
Դեսպանը շեշտեց, որ Չինաստանը Հայաստանը դիտարկում է որպես տարածաշրջանում հուսալի գործընկեր, որի հետ շարունակելու է համակողմանի զարգացնել համագործակցությունը քաղաքականության, տնտեսության, կրթության, գիտության և այլ բնագավառներում:
Նա չմոռացավ խոսել նաև Հայաստանին ցուցաբերած աջակցության մասին` նշելով, որ Չինաստանն իր հնարավորությունների սահմաններում մատուցում է տեխնիկատնտեսական օգնություն. խոսքը վերջին տարիներին Հայաստան բերված ավտոբուսների, շտապօգնության մեքենաների մասին է:
