30.04.2026 | 21:13
Cloudflare-ը ռուսական MAX մեսենջերը լրտեսական հավելված է ճանաչել
Սաուդյան արքայազնն ընդունել է լրագրող Խաշոգջիի սպանության հարցում իր պատասխանատվությունը
Քաղաքականություն
26.09.2019 | 17:17
Սաուդյան Արաբիայի թագաժառանգ արքայազն Մուհամմեդ բեն Սալման ալ Սաուդը ճանաչել է Ստամբուլում հայտնի լրագրող Ջեմալ Խաշոգջիի սպանության հետ կապված իր պատասխանատվությունը: ՏԱՍՍ-ի փոխանցմամբ՝ այս մասին ասվում է ամերիկյան PBS հեռուստաալիքի կայքում հրապարակված փաստագրական ֆիլմի անոնսում: Մարտին Սմիթի հեղինակած ֆիլմը հեռարձակվելու է հոկտեմբերի 1-ին:
«Դա տեղի է ունեցել, երբ ես ծառայության մեջ էի: Ես ինձ վրա եմ վերցնում ամբողջ պատասխանատվությունը»,- ասել է թագաժառանգ արքայազնը:
Նա, սակայն, պնդել է, որ տեղյակ չի եղել Խաշոգջիի հետ կատարվածի մասին: Մուհամմեդ բեն Սալման ալ Սաուդը պարզաբանել է, որ թագավորությունում «20 մլն հպատակ և 3 մլն պետական ծառայող կա», և հնարավոր չէ իմանալ՝ նրանցից յուրաքանչյուրն ինչ է անում:
Անդրադառնալով հարցին, որ լրագրողին սպանողների խմբի անդամներն Էր Ռիադից Ստամբուլ և հակառակ ուղղությամբ տեղաշարժվել են թագավորական ավիապարկի մասնավոր օդանավերով՝ նա ասել է, որ «պաշտոնյաներն ու նախարարներն իրավունք ունեն օգտվել թագավորական ընտանիքի օդանավերից»:
Հիշեցնենք, որ Էր Ռիադի քաղաքականությանը վերաբերող քննադատական հոդվածներով հայտնի Ջեմալ Խաշոգջին անհետ կորել է 2018 թվականի հոկտեմբերի 2-ին, Ստամբուլում Սաուդյան Արաբիայի գլխավոր հյուպատոսություն այցելելուց հետո: Հոկտեմբերի 20-ին սաուդյան իշխանությունները հայտնեցին, որ լրագրողին դիվանագիտական ներկայացուցչության շենքում սպանել են կոնֆլիկտի արդյուքում: Համաշխարհային հանրությունը կտրուկ արձագանքեց այս հանցագործությանը՝ Էր Ռիադից պահանջելով թափանցիկ հետաքննություն անցկացնել:
