ԵՐԵՎԱՆԻ ԺԱՄԱՆԱԿՈՎ. Բոլոր այն մարդկանց դեմ, որոնք կամակատար չեն, ինչ-ինչ օրգանների տրիբունը չեն դարձել, շարունակվելու են խոչընդոտներ ստեղծվել․Գագիկ Գինոսյան

«Ես ընդհանրապես չեմ հասկանում այն, որ գործարարին շնորհվում է ազգային հերոսի կոչում, հատկապես՝ այն իրական  հերոսների ֆոնին, որ ունենք՝ Լեոնիդ Ազգալդյան, Աշոտ Ղուլյան, քառօրյա պատերազմի մասնակիցներից՝ Արմենակ Ուրֆանյան, Ռոբերտ Աբաջյան․․․Կարծես ինչ-որ բան խեղվել  է, և 1996-ից հետո հերոսության համար որևէ  հերոսի կոչում չի տրվել։ Տռզած քսակը հերոս կարգելը տեղին չէ»,- Factor.am-ի «Երևանի ժամանակով» զրուցաշարի շրջանակում նման կարծիք է հայտնում «Կարին» ավանդական երգի-պարի համույթի գեղարվեստական ղեկավար Գագիկ Գինոսյանը՝ անդրադառնալով ՀՀ նախագահի կողմից արգենտինահայ գործարար Էդուարդո Էռնեկյանին ազգային հերոսի կոչում շնորհելուն։

Մեր զրուցակիցը խոսում է նաև Հայաստանում ռուսաց լեզվին նոր կարգավիճակ տրամադրելու թեմայի շուրջ․ «Մեր երկրում մի լեզու կարող է ունենալ կարգավիճակ՝ հայերենն է։ Ուղղակի ծիծաղելի և վիրավորական է խոսել ինչ-որ լեզվի  կարգավիճակ տալու մասին։ Սա երկրորդ քայլն է այն բանից հետո, երբ թույլատրվեց Հայաստանում  ունենալ օտարալեզու դպրոցներ»։

Գագիկ Գինոսյանը իր կարծիքն է հայտնել նաև երգիչ, երգահան Վահան Արծրունու՝ «Զվարթնոց» պատմամշակութային արգելոց թանգարանի տարածքում սեպտեմբերի 29-ին նախատեսված համերգի չեղարկման առնչությամբ․ «Նախապատմությունը չգիտեմ, բայց կարծում եմ՝ Արծրունու ըմբոստ կերպարն է իրադարձությունների «հեղինակը»։ Վստահ եմ, որ դեռ ականատես ենք լինելու նման իրադարձությունների։ Բոլոր այն մարդկանց դեմ,  որոնք կամակատար, ինչ-ինչ օրգանների տրիբունը չեն դարձել, շարունակվելու են խոչընդոտներ ստեղծվել»։

Մանրամասները՝ տեսանյութում։

Աննա Բաբաջանյան