ԱՄՆ-ն իրանական նավթի պատճառով Չինաստանի դեմ նոր պատժամիջոցներ կսահմանի

ԱՄՆ-ն նոր պատժամիջոցներ կսահմանի չինական երկու ընկերությունների դեմ, որոնք, չնայած ամերիկյան պատժամիջոցներին, շարունակում են իրանական նավթ փոխադրել: ՌԻԱ Նովոստիի փոխանցմամբ՝ այս մասին ասել է ԱՄՆ պետքարտուղար Մայք Պոմպեոն:

«ԱՄՆ-ն այսօր քայլեր է ձեռնարկում՝ իրանական ռեժիմի և նրա ապակայունացնող պահվածքին նպաստողների դեմ առավելագույն տնտեսական ճնշում գործադրելու մեր արշավի շրջանակում»,- նշված է հայտարարությունում:

Պետքարտուղարն ընդգծել է, որ նոր սահմանափակումներն ուղղված են նրան, որպեսզի «իրանական ռեժիմը զրկվի ծայրահեղ կարևոր եկամուտներից»:

Պատժամիջոցները կառնչվեն Kunlun Holding Company-ին և COSCO Shipping Tanker-ին: Ընդ որում, այս ընկերություններն ունեն ձեռնարկություններ, որոքն արդեն ներառված են ԱՄՆ-ի պատժամիջոցային ցուցակում՝ China Concord Petroleum Co. Limited-ը, Kunlun Shipping Company Limited-ը, Pegasus 88 Limited-ը, COSCO Shipping Tanker (Dalian) Seaman & Ship Management Co, Ltd-ն:

Բացի այդ՝ պատժամիջոցները կտարածվեն նաև այս ընկերությունների հինգ աշխատակիցների վրա:

Նշենք, որ սեպտեմբերի 14-ին Saudi Aramco սաուդյան նավթագազային պետական ընկերության գործարանների վրա անօդաչուներով հարձակումից հետո ԱՄՆ նախագահ Դոնալդ Թրամփը հրահանգել է զգալիորեն խստացնել Թեհրանի նկատմամբ պատժամիջոցները:

Չնայած հարձակման պատասխանատվությունը ստանձնել են եմենցի ապստամբ հուսիները, որոնց դեմ պայքարում է Սաուդյան Արաբիայի գլխավորած կոալիցիան, Էր Ռիադն ու Վաշինգտոնը կատարվածի համար մեղադրում են Թեհրանին: Իրանն իր հերթին հերքում է մեղադրանքները՝ նշելով, որ նավթային ընկերությունների վրա հարձակումները վնաս են հասցնում ամբողջ տարածաշրջանին: