Դավիթ Հարությունյանի խոսքով՝ տրամաբանական չի, որ 50-ից քիչ աշխատակից ունեցողները ԶԼՄ-ների հարցումներին չպատասխանեն

ՀՀ արդարադատության նախարար Դավիթ Հարությունյանի խոսքով՝ «Տեղեկատվության ազատության մասին» օրենքի նախագծի շուրջ ծավալված քննադատություններն ունեն   անհայտ ծագումնաբանություն:

«Ընդհանրապես անհրաժեշտ է քննարկել այն, ինչ քննարկվում է և պատրաստ է քննարկման, իսկ եթե տարբեր անձանց կողմից հնչած գաղափարների հիման վրա քննարկում է  իրականացվում, հետո դա սկսվում է քննադատվել, ես չգիտեմ, թե ինչ պետք է ես ներկայացնեմ»,-  ասաց նախարարը՝ հավելելով, որ պետք է քննարկվի այն նախագիծը, որը կներկայացնի Արդարադատության նախարարությունը:

Նախագծի աշխատանքային տարբերակը, որը Դավիթ Հարությունյանի խոսքով, անհայտ ծագումնաբանություն ունի, օրեր առաջ դարձավ լրագրողական կազմակերպությունների սուր քննադատության առարկան: Նախագծի գրավոր տարբերակը «Ինֆորմացիայի ազատության կենտրոնի» ղեկավար Լիանա Դոյդոյանը ստացել էր նախարարությունից: Դոյդոյանի փոխանցմամբ՝ իրեն խնդրել էին լրամշակված նախագծի վերաբերյալ կարծիք հայտնել: Դոյդոյանն էլ հանրայնացրել էր՝ կազմակերպելով քննարկում ԶԼՄ ներկայացուցիչների հետ:

Հիշեցնենք, որ նախարարության նախաձեռնությամբ  առաջիկայում կփոխվի արդեն 14 տարի գործող  «Տեղեկատվության ազատության մասին» օրենքը:  Օրենքի նախագծի աշխատանքային տարբերակում տեղ գտած մի շարք դրույթներ խիստ մտահոգել են լրագրողական կազմակերպություններին:

Օրինակ, եթե պետական հիմնարկում աշխատակիցների թիվը 50-ից փոքր է, ապա տվյալ կազմակերպությունը պարտավորված չի լինի պատասխանել լրատվամիջոցների հարցումներին:

Factor.am-ը նախարարից հետաքրքրվեց՝ տրամաբանական համարո՞ւմ է, որ աշխատանքային տարբերակում տեղ գտած այդ դրույթն ընդունվի և կիրառվի:

Նախարարը հակիրճ պատասխանեց, որ այդ դրույթը տրամաբանական չի համարում:

Մանրամասները՝ տեսանյութում:

Շողիկ Գալստյան