«Իմ հարևանների հոգսերը իմ ուսերին եմ վերցրել», «Պիտի ստիպեմ, որ դպրոցամերձ այգին ջրաֆիկացվի». ի՞նչ խնդիրներ են պատրաստվում լուծել Սարիգյուղի ավագանու կին թեկնածուները

Դիլիջանում անցկացվող «Կանայք քաղաքականության մեջ» խորագիրը կրող քննարկմանը լրագրողների հետ հանդիպման էին եկել Տավուշի մարզի Սարիգյուղ համայնքի ավագանու անդամի թեկնածու կանայք՝ դպրոցի տնօրեն Լուիզա Ռևազյանն ու զինկոմիսարիատի աշխատակից Օֆելյա Ռևազյանը: Ի դեպ, տիկնայք մինչ զրույցը սկսելը, ասացին, որ չնայած ազգանունները նույնն են, սակայն բարեկամական որևէ կապ չունեն: «Ես Սարիգյուղ հարս եմ եկել»,- ներկայացավ տիկին Օֆելյան:

Սեպտեմբերի 29-ին Տավուշում անցկացվելիք ՏԻՄ ընտրություններին, Սարիգյուղի ավագանու 5 անդամի պաշտոնը զբաղեցնելու համար պայքարում են 11թեկնածու, որից 3-ը՝ կին :

Ի՞նչ հարցեր կբարձրացնեք ավագանու անդամ ընտրվելու դեպքում՝ հարցին Լուիզա Ռևազյանը պատասխանեց. «Նորից դպրոցի խնդիրները, պիտի ստիպեմ, որ դպրոցամերձ այգին ջրաֆիկացվի, որպեսզի երեխաներն ունենան ագրոնոմիական գիտելիքներ, սիրեն հողը, կապվեն գյուղի հետ ու չմտածեն գյուղը լքելու մասին»:

Factor.am-ի հարցին, որ նախորդ տարի անդրադարձել էինք Սարիգյուղի կրթական ու մշակութային խնդիրներին մեր՝ ԲԱՐԵԿԱՐԳ ԴԱՍԱՍԵՆՅԱԿՆԵՐԻՆ ԿԱՐՈՏ․ ՍԱՐԻԳՅՈՒՂ․ Կյանքը նոր Հայաստանի հին գյուղերում և ՍԱՐԻԳՅՈՒՂԻ ՄՇԱԿՈՒՅԹԻ ԹԱԼԱՆՎԱԾ ԵՐԱԶԱՆՔԸ․Կյանքը նոր Հայաստանի հին գյուղերում  վերտառությամբ տեսանյութերով, ի՞նչ է փոխվել այսօր: Դպրոցի տնօրենն ուրախությամբ պատասխանեց, որ դպրոցն այսօր ամբողջությամբ վերանորոգված է, ակնկալվում է նաև մշակույթի տան վերանորոգումը:

Իսկ ահա Օֆելյա Ռևազյանը ավագանու անդամ ընտրվելու դեպքում պատրաստվում է սոցիալական հարցեր բարձրացնել ու հասնել դրանց լուծմանը. «Իմ հարևանության հոգսերը իմ ուսերին եմ վերցրել, որպեսզի համայնքում գազ լինի, մանկապարտեզ ունենալու հարցը կարելի է բարձրացնել»: