«ՍԴ ճգնաժամը ներկա օրենսդրական բազայով հնարավոր չէ լուծել»․ Նազելի Բաղդասարյան. ՏԵՍԱՆՅՈՒԹ

Factor TV-ի զրուցակիցն է ԱԺ «Իմ քայլը» խմբակցության պատգամավոր Նազելի Բաղդասարյանը

-Տիկին Բաղդասարյան, ի՞նչ է կատարվում խմբակցությունում Ամուլսարի հետ կապված։

-Խմբակցությունում նորմալ աշխատանքային պրոցես է։ Եթե ասեմ, որ ընդհանրապես Ամուլսարի թեման չի քննարկվում, տրամաբանական չի լինի, բազմաթիվ քննարկումներ են եղել խմբակցության ներսում, հնչեցվել են այն մտահոգությունները, որոնք ունեին պատգամավորները, որոնք դեմ էին Ամուլսարի շահագործմանը։ Դիրքորոշումները լսվել են, քննարկվել է նաև այս հարցը վարչապետի հետ, ներկայացվել են այն մտահոգությունները, որոնք ունեինք։ Այո՛, եղել է կարծիքների բախում, բայց քանի որ այնուամենայնիվ, Ամուլսարի որոշման հարցը չի գտնվում ԱԺ տիրույթում, փաստացիորեն ԱԺ-ն այս պարագայում ոչինչ չի կարող անել, սա հատուկ եմ նշում։ Որովհետև, բնականաբար, ներկայացուցչական մարմինը, ժողովրդից մանդատ ստացած մարմինը միշտ էլ անելիք ունի և, կարծում եմ, քայլերը հաջորդական, եթե խնդիրներ առաջանան, ի հայտ կգան և ԱԺ-ն իր կարծիքը կհայտնի։

-Դուք կարիք չեք զգու՞մ, որպեսզի ԱԺ-ն լսումներ կազմակերպի Ամուլսարի հետ կապված, որպեսզի ժողովուրդն էլ հասկանա, թե ինչ են մտածում պատգամավորները։

-Լսումներն ընդհանրապես պետք է չլինեն ինքնանպատակ։ Եթե լսումների արդյունքում ինչ-որ մի բան պարզվի, այնուամենայնիվ, ԱԺ-ն չունի այն լծակը, որ որոշումների վրա ազդեցություն ունենա։

-Վարչապետին առայժմ չի հաջողվում ժողովրդին համոզվել, որ Ամուլսարի չշահագործման համար իրավական հիմքեր չկան։ Այսինքն, պետք է շահագործվի։ Ձեր կարծիքով ինչո՞ւ վարչապետ-հասարակություն երկխոսությունը գոնե Ամուլսարի մասով չի ստացվում։

-Այն, որ Ամուլսարի մասով կան մտահոգված հասարակության տարբեր շերտերի ներկայացուցիչներ, իհարկե անժխտելի է։ Որոշ մարդիկ իսկապես սկզբունքային կերպով դեմ են հանքերի շահագործմանը, շատ մարդիկ տեսնում են վտանգներ, խնդիրներ տեսնում են բնապահպաները, բայց վստահ եմ, որ հասարակության մեջ կան այնպիսի մարդիկ, որոնք ուզում են իրավիճակը ի շահ իրենց բանեցնել։ Այդ խմբի հետ ընդհանուր եզրի գալ անհնար է, որովհետև դա բխում է նաև շատ ու շատ խնդիրներից։ Այս խնդիրն է, որ շատ դեպքերում պրովոկացվում է։ Մնացած խմբերի հետ ես կարծում եմ, որ դուք էլ չեք ժխտի, որ այնուամենայնիվ, գործադիրի կողմից և վարչապետի կողմից ամենատարբեր քննարկումները և լայն շրջանակում հանդիպումներ տեղի ունեցել են, այսինքն, մանրակրկիտ կերպով փորձել են լսելի դարձնել խնդիրները։ Այլ հարց է, որ շատերին սա չի գոհացնում։ Բայց եթե ես ասեմ, որ երկխոսություն որևէ կերպ չի եղել և գործադիր մարմինն ու գործադիրի ղեկավարը ձեռք չի մեկնել, իհարկե դա այդպես չէ։ Բայց իրավական հիմքի առումով ես տեսնում եմ, որ այստեղ մենք խնդիր կունենանք։ Օրինակ, եթե Քննչական կոմիտեն ասեր, որ այստեղ կոռուպցիոն ռիսկեր կան, այո՛, խնդիրներ եղել են և դա բավարար հիմք կլիներ։ Բայց քանի դեռ մենք այդ հիմքը չունենք, ես այլ որոշում կամ այլ տրամաբանություն չեմ գտնում այս հարցի մեջ։

-Տիկին Բաղդասարյան, ջերմուկցիներն արդեն արձագանքել են վարչապետի կոչին ճանապարհները բացելու վերաբերյալ և ասել, որ չեն բացելու Ամուլսար տանող ճանապարհները։ Հնարավո՞ր է, որ վարչապետը գնա ուժային լուծման։

-Ես կարծում եմ, որ այս կառավարության որդեգրած արժեքներից մեկը նման և այլ հարցերում ուժ չբանեցնելն է, որովհետև սա անթույլատրելի է։ Անգամ եթե արհեստական բախումների տանեն, ես վստահ եմ, որ պատգամավորները և, ինչո՞ւ չէ, նաև վարչապետը, կլինեն առաջին շարքերում։

-Հովիկ Աղազարյանը հայտարարել է, որ Ամուլսարի հարցը կարող է լուծվել վստահության հանրաքվեի միջոցով։ Կո՞ղմ եք հանրաքվեին։

-Չէ։ Միանշանակ ասում եմ՝ ոչ։ Որովհետև սրա համար առաջինը չկա իրավական հիմք, և վստահության քվեն դեկտեմբերի 9-ին տեղի ունեցած ընտրություններն են։ Ինչո՞ւ։ Որովհետև Ամուլսարի և ընդհանրապես հանքերի առումով դիրքորոշումը եղել է «Իմ քայլի» նախընտրական ծրագրում։ Այնտեղ որևէ դրույթ չեք գտնի, որ հանքերը չպետք է շահագործվեն, այսինքն, այնպիսի մոտեցում, որը կար ՔՈ-ի նախընտրական ծրագրում, «Սասնա ծռերի» նախընտրական ծրագրում։

-Արդեն քանի ամիս ոչ մի կերպ չի հանգուցալուծվում Սահմանադրական դատարանի ճգնաժամը։ Ըստ Ձեզ ինչո՞ւ է ուշանում հանգուցալուծումը։

-Որովհետև այստեղ քաղաքական կառավարող ուժը ուզում է գնալ իրավական եղանակով։ Իհարկե, մեթոդներ միշտ կան։ Եթե հին մեթոդներով առաջնորդվենք, մենք ապրում ենք Հայաստանում և գիտենք, թե նախկինում դա ինչպես էր արվում։ ԱԱԾ-ում մնացած միջոցներով փաստեր բերվում են ի ցույց, և մարդիկ գրում գնում են։

-Գիտե՞ք, որ ԱԺ-ին են մեղադրում ուշացնելու համար։

-Գիտեմ։ Տեղյակ եմ։ Միգուցե արդարացի են, բայց այսպես ասեմ՝ ՍԴ հարցը և դատարանի խնդիրը ներկա օրենսդրական բազայով հնարավոր չէ լուծել։ Եվ սա է պատճառը, որ նույն դատաիրավական բարեփոխումների փաթեթով մենք առաջարկում ենք փուլային լուծումներ և ՍԴ-ի օրենսդրության փոփոխությունը հնարավորություն կտա այս խնդրի մասնակի լուծման։ Հնարավոր է, որ սպասումները շատ են և միգուցե ԱԺ-ն այստեղ արագացնելու խնդիր ուներ, բայց մեզ համար իրավական ընթացակարգերի ճշգրիտ պաշտպանությունը կամ ճշգրիտ իրացումը խիստ կարևոր էր, որպեսզի մենք վաղը մյուս օրը խնդիրներ չունենանք և մեր շտապողականությունը ի վնաս չլիներ։ Մենք գնում ենք դանդաղ, բայց վստահ քայլերով։

Զրուցեց Մհեր Արշակյանը

Մանրամասները՝ տեսանյութում։