Քաղաքականություն
02.09.2019 | 21:46
Լիբանանում իրավիճակն այս պահին, նախորդ օրվա համեմատ, հանդարտ է: Այս մասին տեղեկացրեց Լիբանանի հայկական «Ազդակ» օրաթերթի գլխավոր խմբագիր Շահան Գանտահարյանը՝ Factor.am-ի հետ զրույցում անդրադառնալով նախօրեին լիբանանյան «Հըզբալլահ»-ի և Իսրայելի միջև փոխադարձ հրետակոծությանը:
«Երեկ երեկոյան կողմ արդեն իրադրությունը նորմալ հուն վերադարձավ: Պաշտոնական Թել Ավիվը ևս հայտարարեց, որ վերջ են դնում ռազմական գործողություններին: Բայց չի բացառվում, որ նման տեղայնացված ոտնձգություններ, ռազմական գործողություններ, փոխադարձ ռմբակոծություններ լինեն, որովհետև այն, ինչ եղավ երեկ, նախադեպ ունի: Հատկապես սահմանին նման միջադեպեր արձանագրվում են, սա առաջին դեպքը չէ»,- հավելեց նա:
Նրա խոսքով՝ որոշակի մտահոգություն կար, որ սա կարող է ավելի մեծամասշտաբ գործողությունների վերածվել, բայց երկու կողմի գործողություններում էլ, կարծես, որոշակի զսպվածություն կար:
Շահան Գանտահարյանը նշեց նաև, որ մայրաքաղաք Բեյրութի հարավային արվարձաններ հասած իսրայելական անօդաչու թռչող սարքերի թիրախում «Հըզբալլահ»-ի տեղեկատվական գրասենյակն է եղել. «Բարեբախտաբար, միայն նյութական վնասներ են արձանագրվել: Իսկ երկրորդ անօդաչուն, որը խոցվեց, լրտեսական, հետախուզական գործողություններ է իրականացրել: «Հըզբալլահ»-ն անմիջապես առաջին քարտուղարի միջոցով խոստացավ հակադարձել, պատժիչ գործողություն կազմակերպել: Եվ երեկ իրականացավ այդ գործողությունը»:
Ավելի ուշ «Հըզբալլահ»-ը, ըստ մեր զրուցակցի, հստակեցրեց, որ իրենց գործողությունները պատասխանն էին ոչ թե Բեյրութի իրենց կենտրոնի վրա անօդաչու թռչող սարքի միջոցով հարձակման, այլ Սիրիայում «Հըզբալլահ»-ի հենակետերի վրա Իսրայելի հարձակման հետևանքով շիաների շարժման զինյալների զոհվելու:
Հարցին՝ մտահոգություն կա՞, որ Սիրիայում մարտական գործողություններին «Հըզբալլահ»-ի զինյալների մասնակցության համար կարող է վճարել Լիբանան պետությունը՝ լայնածավալ հարձակման ենթարկվելով Իսրայելի կողմից, Շահան Գանտահարյանը պատասխանեց, որ նման սպառալիքներ Թել Ավիվը բազմիցս է հնչեցրել:
«Իսրայելը միշտ Լիբանանի կողմից թանկ վճարելու սպառնալիքները հնչեցնում է: Կարծում եմ, որ խնդիրը պետք է առավելապես դիտարկել Իրանի հետ Իսրայելի ունեցած լարված հարաբերություններով, որովհետև «Հըզբալլահ»-ը, ի վերջո, նաև Իրանի նեցուկը վայելող կազմակերպություն է: Կարելի է ասել, որ միջազգային քաղաքական շրջանակները «Հըզբալլահ»-ը դիտարկում են որպես Իրանի ռազմական ուժերի մեկ ստորաբաժանում»,- նշեց նա:
Սակայն Լիբանանը պետական մակարդակով, ըստ Գանտահարյանի, այսօր օրինաչափ է գնահատում դիմադրությունը:
«Լիբանանյան պետական որոշումներով այսօր դիմադրությունը նկատվում է շատ օրինական, օրինաչափ երևույթ, որն անհրաժեշտություն է՝ նկատի ունենալով հարավային հարևանի սանձազերծած ոտնձգությունները Լիբանանի դեմ: Չմոռանանք նաև, որ լիբանանյան տարածքներ կան, որոնք մինչ օրս գրավված են Իսրայելի կողմից և գտնվում են Իսրայելի ԶՈՒ-ի վերահսկողության ներքո»,- ասաց Շահան Գանտահարյանը:
Նա նշեց, որ այս ամենը նկատի ունենալով՝ խոսվում է ավելի լայնածավալ ռազմական գործողությունների մասին, սակայն կարծիք հայտնեց, որ միջազգային հանրությունը կմիջամտի, որպեսզի սահմանային շրջաններում արձանագրված բախումները համընդհանուր պատերազմի չբերեն. «Մասնավորապես, վերջին դեպքերը միջազգային հնչեղություն ստացան, զսպվածության կոչեր հնչեցին»:
Հիշեցնենք, որ Լիբանանի և Իսրայելի սահմանը կիրակի «Հըզբալլահ»-ի և իսրայելական բանակի միջև հերթական կոնֆլիկտի թատերաբեմ է դարձել:
Լիբանանյան շիաների «Հըզբալլահ» շարժման զինյալները հրեական Աֆիֆիմ բնակավայրի մերձակայքում հակատանկային հրթիռով իսրայելական զրահամեքենա են խոցել:
«Իսրայելն ագրեսիվ գործողություններ է իրականացնում Լիբանանի, Սիրիայի և Իրաքի դեմ, և մենք չենք կարող դա անպատասխան թողնել»,- հայտարարել է «Հըզբալլահ»-ի առաջնորդ Հասան Նասրալլան:
Թամարա Հակոբյան
