«Հըզբալլահ»-ն ու Իսրայելը «հարվածներ են փոխանակել»

Լիբանանի և Իսրայելի սահմանը, որն այնտեղ տեղակայված ՄԱԿ-ի խաղաղարարների սաղավարտների գույնի պատճառով «երկնագույն գիծ» են կոչում, կիրակի «Հըզբալլահ»-ի և իսրայելական բանակի միջև հերթական կոնֆլիկտի թատերաբեմ է դարձել: Լիբանանյան շիաների «Հըզբալլահ» շարժման զինյալները հրեական Աֆիֆիմ բնակավայրի մերձակայքում հակատանկային հրթիռով իսրայելական «Վոլֆ» զրահամեքենա են խոցել, գրում է ՏԱՍՍ-ը:

Զինված բախման հետևանքով, «Հըզբալլահ»-ի տվյալներով, իսրայելական զինծառայողների շրջանում կորուստներ կան: Ի պատասխան՝ իսրայելական հրետանին շուրջ երկու ժամ կրակի տակ է պահել Լիբանանի հարավը: Իսրայելի վարչապետ Բենիամին Նեթանյահուն, սակայն, հայտարարել է, որ իսրայելցի զինվորականները չեն տուժել:

Միաժամանակ, Al Hadath հեռուստաալիքը տեսանյութ է հրապարակել, որում երևում է, թե ինչպես են իսրայելական ուղղաթիռները վիրավոր զինվորներին Հայֆայի «Ռամբամ» հոսպիտալ հասցնում:

Աղբյուրի փոխանցմամբ՝ «Հըզբալլահ»-ի առաջնորդ Հասան Նասրալլան շաբաթ իր կողմնակիցների հետ հանդիպմանն ունեցած ելույթում ակնարկել է, որ իր զինյալները պատրաստվում են հաշվեհարդար տեսնել Իսրայելի հետ և զինված հարձակում իրականացնել՝ ի պատասխան Բեյրութում և հարակից շրջաններում իսրայելական անօդաչուների հարվածների:

«Իսրայելն ագրեսիվ գործողություններ է իրականացնում Լիբանանի, Սիրիայի և Իրաքի դեմ, և մենք չենք կարող դա անպատասխան թողնել»,- ասել է նա:

«Հըզբալլահ»-ի զինյալները որպես հարձակման վայր ընտրել են Մարուն էր-Ռաս քաղաքի մերձակայքը, որտեղ 2006 թվականի հուլիսին Լիբանան իսրայելական ներխուժման ժամանակ կողմերը բախվել են և կորուստներ կրել: Լիբանանյան ռազմական փորձագետ, գեներալ Ամին Հոթեյթը նշել է, որ իսրայելական հետախուզությունը, ըստ ամենայնի, այլ վայրում էր հարվածի սպասում: