15.10.2026 | 16:44
Գագիկ Ծառուկյանի գործով մեղադրական եզրակացությունը չի համապատասխանում օրենքի պահանջին. Երեմ Սարգսյան
Հայաստանում միջազգային տնտեսական համաժողով կկազմակերպվի. վարչապետ
Տնտեսություն
22.09.2017 | 12:31
ՀՀ վարչապետ Կարեն Կարապետյանն այսօր Կառավարության նիստի մեկնարկին տեղեկացրեց, որ Հայաստանում 2018 թվականին միջազգային տնտեսական համաժողով կկազմակերպվի:
«Օրերս կայացած Հայաստան-սփյուռք համաժողովի ընթացքում ներկայացրինք Հայաստանի տնտեսական հստակ ներուժի, ներդրումային ծրագրերի և արձանագրված տնտեսական աճի վերաբերյալ համալիր տեղեկատվություն: Փաստը, որ մենք ունենք, դա առավել հասանելի դարձնելու խնդիրն է: Այդ պատճառով հարկավոր է մեր գիտական և տնտեսական ներուժը հասանելի դարձնել համաշխարհային ճանաչում ստացած տնտեսական կազմակերպություններին և ձեռնարկատերերին՝ մեր երկրում կազմակերպելով ժամանակակից պահանջներին համապատասխանող տնտեսական միջոցառումներ»,- նշեց Կարապետյանը:
Գործադիրի ղեկավարը կառավարության աշխատակազմի ղեկավարին հանձնարարեց մեկշաբաթյա ժամկետում Հայաստանում 2018 թվականին միջազգային տնտեսական համաժողով կազմակերպելու նպատակով մշակել միջգերատեսչական հանձնաժողով ստեղծելու վերաբերյալ համապատասխան իրավական ակտի նախագիծ: Նախագծով պետք է նախատեսվի հանձնաժողովի կազմը՝ փոխվարչապետի գլխավորությամբ և տնտեսական ոլորտի նախարարների մասնակցությամբ:
«Խոսքը հետևյալի մասին է՝ մենք իրականում ուզում ենք տնտեսական և ինվեստիցիոն ռեգուլյար հարթակ ստեղծել Հայաստանում, որտեղ մենք պատմելու ենք ինչպիսի Հայաստան ենք ուզում տեսնել վաղը, ինչ տեսլական ունենք, համաշխարհային ճանաչում ստացած մասնագետների հետ քննարկել մեր մոտեցումներն ու պատկերացումները: Ինչպես նաև այդ հարթակում պետք է ստեղծել հնարավորություն, որպեսզի այն նախագծերը, որոնք մենք պատրաստում ենք և իրագործում ենք, կարողանանք ներկայացնել մեր պոտենցիալ գործընկերներին»,- եզրափակեց Կարեն Կարապետյանը:
