30.04.2026 | 19:47
Չեմպիոնների լիգայում հայտնի է շաբաթվա լավագույն ֆուտբոլիստը
Սիրիական բանակը վերահսկողության տակ է վերցրել Խան Շեյխուն քաղաքը
Քաղաքականություն
22.08.2019 | 17:52
Սիրիայի կառավարական բանակը վերահսկողության տակ է վերցրել Իդլիբ նահանգում գտնվող Խան Շեյխունը։ Այս պահին քաղաքում մաքրման և ականազերծման աշխատանքներ են իրականացվում, գրում է «Իզվեստիա»-ն:
Օգոստոսի 19-ին հայտնի էր դարձել, որ սիրիական բանակը Խան Շեյխունը կրակի տակ է պահել՝ գրավելով քաղաքի շրջակայքի առանցքային դիրքերն ու կտրելով զինամատակարարման ուղիները: Նույն օրը Սիրիայի ԱԳ նախարարությունը հաղորդել էր, որ թուրքական զրահատեխնիկա փոխադրողները խախտել են Սիրիայի սահմանը և շարժվում են դեպի Խան Շեյխուն:
Թուրքիայի ՊՆ-ն իր հերթին հայտարարել էր Իդլիբում թուրքական զորքերի վրա Սիրիայի օդուժի կողմից հարձակման ժամանակ 3 քաղաքացիական անձի զոհվելու և 12 վիրավորի մասին: Հաջորդ օրը Ռուսաստանի ԱԳ նախարար Սերգեյ Լավրովը նշել էր, որ ռուսական և թուրքական զինված ուժերը մշտական կապի մեջ են Իդլիբում զինյալների կողմից հաճախակի հարձակումների հարցով:
Օգոստոսի 4-ին էլ Թուրքիայի նախագահ Ռեջեփ Թայիփ Էրդողանը հայտարարել էր, որ երկիրը նոր ռազմական գործողություն է սկսելու Սիրիայի հյուսիսում ՝ Եփրատ գետից արևելք, և այդ մասին արդեն տեղեկացրել է Ռուսաստանին ու Միացյալ Նահանգներին: Նշված տարածքը վերահսկվում է ԱՄՆ-ի կողմից աջակցություն վայելող քրդական ինքնապաշտպանության ստորաբաժանումների կողմից, որոնց Անկարան ահաբեկիչ է համարում:
Սիրիայում զինված հակամարտությունը շարունակվում է 2011 թվականից: 2015-ին ՌԴ Զինված ուժերը, պաշտոնական Դամասկոսի հրավերով, սկսել էին աջակցել երկրի տարածքներն ապօրինի զինված խմբավորումներից ազատագրելուն: Երկու տարի անց ռուսական հրամանատարությունը հայտարարել էր ռազմական գործողությունների ակտիվ փուլի ավարտի մասին:
