14.01.2026 | 23:33
Կառավարությունը փոփոխություն է առաջարկում ավագանու անդամների հրաժարականի կարգում
Ստամբուլում և 3 նահանգներում բողոքի ցույցերը ճնշվել են ոստիկանության կողմից
Քաղաքականություն
21.08.2019 | 21:44
Թուրքիայի մի շարք քաղաքներում բողոքի ցույցեր են ընթանում ընդդիմադիր քրդամետ «Ժողովուրդների դեմոկրատական» կուսակցության (ԺԴԿ-HDP) անդամ քաղաքապետների պաշտոնանկության կապակցությամբ: Դիարբեքիր, Վան, Մարդին նահանգներում և Ստամբուլում կազմակերպված ցույցերին միջամտել են ոստիկանները, կան ձերբակալվածներ և վիրավորներ։ Այս մասին գրում է ermenihaber.am-ը։
Ստամբուլի Քադըքյոյ շրջանում կազմակերպված ցույցերի ժամանակ անվտանգության ուժերի հետ տեղի ունեցած բախումների հետևանքով անվտանգության 3 աշխատակից է դանակահարվել և 16 ցուցարար ձերբակալվել։
Դիարբեքիրում տեղի ունեցած ցույցերի ժամանակ ոստիկանության միջամտության հետևանքով ԺԴԿ-ի երկու պատգամավոր է վիրավորվել։ ԺԴԿ-ի Բաթման պատգամավոր Ֆելեքնաս Ուջան պատմել է, որ երբ ոստիկանության աշխատակիցներին ներկայացել է որպես պատգամավոր, իրեն պատասխանել են․ «Դու իմ պատգամավորը չես» և մահակներով հարձակվել իրենց վրա։ Արդյունքում Ուջան մահակի հարված է ստացել ոտքին, իսկ մեկ այլ ԺԴԿ-ական պատգամավոր Այշե Աջարը՝ գլխին։ Պատգամավորները տեղափոխվել են հիվանդանոց։
Մարդին նահանգում ևս ոստիկանությունը միջամտել է քաղաքապետների պաշտոնանկության դեմ կազմակերպված ցույցերին։ Բախումների ժամանակ ԺԴԿ-ի Ադանայի պատգամավոր Թյուլայ Հաթիմօղուլլարը վիրավորվել և հիվանդանոց է տեղափոխվել։
Իսկ Վանում ոստիկանությունը ԺԴԿ-ի պատգամավորներին և հասարակական-քաղաքական կազմակերպությունների ներկայացուցիչներին արգելել է իրականացնել նախապես ծրագրված մամուլի ասուլիսը, որը նույնպես ուղղված էր պաշտոնաթող քաղքապետներին աջակցելուն։
