22.04.2026 | 11:36
Թրամփը հայտարարել է, թե Հորմուզի նեղուցի շրջափակման վերացումը վերջ կդնի գործարքի հնարավորություններին
Մեր խնդիրը բովանդակություն փոխելը չի եղել. փոխնախարարը՝ պատմության դասագրքի վերաշարադրման մասին․ ՏԵՍԱՆՅՈՒԹ
Հասարակություն
20.08.2019 | 13:13
Ձևավորվել է պատմաբանների 6 հոգանոց աշխատանքային խումբ, որի առջև խնդիր ենք դրել՝ ուսումնասիրել 9-րդ դասարանի Հայոց պատմության դասագիրքն ու ծրագիրը և առաջարկություններ ներկայացնել: «Վերախմբագրե՞լ Հայոց պատմության դասագիրքը՝ ըստ նոր իրավիճակի» թեմայով այսօր կազմակերպված քննարկման ժամանակ նշեց ՀՀ կրթության, գիտության, մշակույթի և սպորտի փոխնախարար Լուսինե Առաքելյանը:
«Արդյունքում մենք ստացել ենք և՛ բովանդակային, և՛ խմբագրական դիտարկումներ ու առաջարկություններ: Մեր խնդիրը չի եղել բացարձակ բովանդակություն փոխել, նույնիսկ նորագույն ժամանակների հետ կապված, վերջին իրադարձությունների մասին որևէ խոսակցություն չի եղել: Առհասարակ չի եղել դրանց մեկնաբանման հետ կապված որևէ բան ավելացնելը, սա ես ուզում եմ հստակ շեշտել»,- ընդգծեց փոխնախարարը:
Նրա խոսքով՝ ծրագիրն ուղարկվել է Կրթության ազգային ինստիտուտ՝ կարծիք ստանալու, և այն, ինչ ենթակա է վերախմբագրման՝ տեխնիկական վրիպակներ, որոշ բաներ էլ՝ բովանդակային առումով, հրատարակություններն ու հեղինակները վերախմբագրել են:
«Խնդիրն առաջացավ այն պահից, երբ առաջարկ ներկայացվեց՝ դասագրքում ներգրավել նաև 2013-2018թթ. իրադարձությունները: Մենք ապրիլին հանդիպել ենք հանձնաժողովի անդամների հետ, և ինքներս ենք հարցրել՝ համաշխարհային փորձն ինչպե՞ս է պատմության դասագրքերում ներգրավում վերջին իրադարձությունները, նորագույն շրջանի ո՞ր ժամանակահատվածից սկսած են ներգրավում, և արդյո՞ք նպատակահարմար է այս պահին քաղաքական իրողությունները որպես մեկնաբանություն և արդեն որակավորում, իրողություն ներկայացնել դասագրքերում»,- նշեց Լուսինե Առաքելյանը:
Փոխնախարարը հավելեց, որ այդ հարցի պատասխանը պատմաբաններից չեն ստացել. «Դասագրքի ուսումնասիրությունն ու առաջարկություն ներկայացնելու մեր խնդրանքը բացարձակ չի բխել, որպեսզի վերջին շրջանի իրադարձություններն արհեստական ներկայացվեն»:
Մանրամասները՝ տեսանյութում:
