Վահե Գրիգորյանի նամակի մեջ համընկնումներ կան. նախարարը՝ ՍԴ անդամներին վաղաժամ թոշակի ուղարկելու նախագծի մասին․ ՏԵՍԱՆՅՈՒԹ

ՀՀ արդարադատության նախարարը չի կիսում կարծիքը, թե Սահմանադրական դատարանի մասին օրենքի նախագիծը «կաշառք» է ընկալվում:

«Չեմ լսել, որ որևէ մեկի կողմից դա որակվի որպես կաշառք: Վաղ կենսաթոշակի սխեմա է առաջարկվում, որը շատ երկրներում է կիրառվում, ընդունված սխեմա է», – լրագրողների հետ ճեպազրույցում ասաց ՀՀ արդարադատության նախարար Ռուստամ Բադասյանը:

Նախարարը նկատեց, որ ցանկացած պարագայում ՍԴ դատավորը կենսաթոշակ ստանում է, իսկ նախագծով առաջարկվում է հրաժարականի դեպքում մինչև 65 տարեկան ՍԴ անդամի թոշակի հարցը կարգավորել:

Հստակեցնող հարցին՝ սա քաղաքակա՞ն որոշում է, որն ուղղված է ՍԴ գործող դատավորներից ազատվելուն, Բադասյանն ասաց. «Ոչ, այս ամենը բխում է ստեղծված իրավիճակից ու ստեղծված իրավիճակում առաջարկվող օրենսդրական լուծում է: Ցանկացած լուծում իր մեջ որոշակի քաղաքական տարր է պարունակում: Դա չի նշանակում կուսակցական որոշում, նշանակում է քաղաքական, որը չի կարող դուրս գալ ու դուրս չի գալիս իրավական պետության սկզբունքների շրջանակից»:

Նախարարը նկատեց, որ առաջարկվող փոփոխությունը կամավորության սկզբունքով է լինելու: Դիտարկմանը՝ արդյո՞ք սա նաև Վահե Գրիգոյանի նամակի արձագանքն է, քանի որ առաջարկվող կետերից մեկով Գրիգորյանը խոսում է վաղաժամկետ կենսաթոշակի մասին, Բադասյանն ասաց. «Ասել եմ բազմիցս, որ պարոն Գրիգորյանի նամակի ինչ-որ հատված կա, որը կարող է հիմնավորումների հետ համընկնել, բայց որ որպես արձագանք…»:

Հիշեցնենք, որ Սահմանադրական դատարանի մասին օրենքի նախագծով Սահմանադրական դատարանի դատավորներին առաջարկվում է, օգոստոսի 1-ից հոկտեմբերի 31-ը հրաժարական տալու դեպքում, մինչև պաշտոնավարման տարիքը լրանալը պահպանել իրենց հրաժարականի պահին ունեցած աշխատավարձը:

Մանրամասները՝ տեսանյութում:

Նարեկ Կիրակոսյան