02.02.2026 | 21:50
Հնդկաստանի ԶՈՒ պաշտպանության շտաբի պետը այցելել է Հայոց ցեղասպանության զոհերի հուշահամալիր
Վարչապետի հետ հանդիպել եմ և ասել, որ կրթության և գիտության ֆինանսավորումը 20-ապատկելը քիչ է. Արայիկ Հարությունյան. ՏԵՍԱՆՅՈՒԹ
Հասարակություն
14.08.2019 | 19:09
Factor.am-ի հարցազրույցը Կրթության, գիտության, մշակույթի և սպորտի նախարար Արայիկ Հարությունյանի հետ
– Պարո՛ն Հարությունյան, արդեն երկու ամսից ավելի է՝ Կառավարության կառուցվածքային փոփոխությունների արդյունքում ղեկավարում եք երեք միավորված նախարարություն: Ընդդիմադիրներն ասում էին, որ այդ գերատեսչությունների ղեկավարները դառնում են սուպերնախարարներ: Հե՞շտ է սուպերնախարար աշխատելը: Եվ, ընդհանրապես, արդեն պա՞րզ է, թե այս միավորումների դրական և բացասական կողմերը որոնք են:
– Երկու ամիսները բավականին բարդ են եղել, որովհետև երեք տարբեր գերատեսչություններ պետք է միասին աշխատեին, բայց ընթացքը հարթ է գնում: Մեծ խնդիրներ չկան, մինչ միավորումը երեք նախարարությունների աշխատակիցները միասին գործակցել են, վերացրել են այն հնարավոր խնդիրներ, որոնք կարող էին առաջանալ: Հեշտ չէ ղեկավարելը, սուպերնախարարություն է, թե չէ, սովորական նախարարություն է, որն ունի իր գործառույթները: Խնդիրները շատ են, նախկինից ժառանգած խնդիրներ էլ կան, որոնք լուծումների կարիք ունեն: Շատ մեծ բարդություններ չունենք, բայց նախարարությունը մեծացել է, լրացուցիչ գործառույթներ են ավելացել և ժամանակ են պահանջում:
– Երբ խոսք գնաց նախարարությունների միավորման մասին, հիմա արդեն Ձեր ղեկավարման տակ գտնվող Մշակույթի նախարարության աշխատակիցները բողոքի ակցիաներ կազմակերպեցին՝ նշելով, որ անգործ են մնալու և այլն: Հիմա, կարծես, այդ օպտիմալացման գործընթացը դանդաղում է: Ընդհանուր օպտիմալացումը քանի՞ փուլով է լինելու, մինչև հիմա քանի՞ աշխատակից է կրճատվել և նախարարությունը վերջնական քանի՞ աշխատակից է ունենալու:
– Բողոքի այդ ակցիները, որ տեղի ունեցան, հիմնավորված չէին, որովհետև նախարարությունների միավորման հիմքում օպտիմալացումը և կրճատումները չէին, այլ աշխատանքի արդյունավետության մեծացումը: Այս միավորման արդյունքում կրկնվող պաշտոնները կրճատվեցին, որոնք մինչև երկու տասնյակ են: Մյուս դեպքերում հաստիքների կրճատում չի եղել: Առաջիկայում արդյունավետության բարձրացման աշխատանքներ կտանենք, որը կլինի կառուցվածքային փոփոխության հաջորդ փուլը: Միավորման արդյունքում տեսել ենք, որ կան ուռճացված վարչություններ, գուցե այդ հաստիքների տեղափոխմամբ կամ կրճատմամբ այդ հարցը կլուծենք: Կլինեն հաստիքների փոփոխություններ, վարչությունների կրճատում: Այն, որ խոսում էին հարյուրավոր կրճատումների մասին, այդպիսի բան չկա: Կան պաշտոնյաներ, որոնց անարդյունավետությունը տեսնում ենք, և նրանք պետք է ջանքեր գործադրեն՝ իրենց աշխատելաոճը փոխելու համար, եթե ոչ, մենք միջոցներ կձեռնարկենք, աշխատանքի դանդաղեցում թույլ չենք տա:
– Ի՞նչ է փոխվել Հայաստանի կրթական համակարգում հեղափոխությունից հետո: Մենք կրթական հեղափոխություն ունենալո՞ւ ենք, թե՞ ոչ:
– Կրթական համակարգում հեղափոխությունը ժամերի, օրերի, ամիսների խնդիր չէ, դա երկարատև պրոցես է: Դրա արդյունքները կտեսնենք միջնաժամկետ կտրվածքով՝ մի քանի տարիների ընթացքում: Կարող ենք ասել, որ կրթական համակարգում կոռուպցիայի ողնաշարը կոտրված է:
– Այսինքն՝ դպրոցներում տնօրենները գումարով չեն ընտրվում կամ բուհերում ուսանողները՝ գնահատական ստանում: Սա վերացե՞լ է:
– Ես չեմ կարող ասել, որ դրանք ամբողջությամբ վերացել են, բայց որ զգալի կրճատվել են, միանշանակ է: Բուհերի հետ կապված մի հետազոտություն ենք ուսումնասիրել, որտեղ նշված է, որ կոռուպցիան բուհերում ցածր մակարդակի վրա չէ:
– Պարո՛ն Հարությունյան, Նիկոլ Փաշինյանն Արցախում երկրի զարգացման նպատակային կետերը թվարկեց, որ մինչև 2050 թվականն ունենալու ենք 5 մլն բնակչություն, մեր հետախուզությունը լինելու է աշխարհի լավագույն տասնյակի մեջ, իսկ կրթության մասով նշեց՝ կրթությունը դարձնել ազգային ապրելակերպ, կրթության և գիտության ֆինանսավորումը 20-ապատկել: Այս ծրագիրն ինչպե՞ս եք իրականացնելու՝ գոնե Ձեր կառավարման շրջանում, և ի՞նչ ասել է՝ կրթությունը դարձնել ազգային ապրելակերպ:
– Դա այն է, ինչ հիմա մենք, ըստ էության, անում ենք, և երբ նախարարությունների միավորման մասին ենք խոսում, դա միտված է հենց այդ խնդրի լուծմանը: Երբ 20 անգամ բյուջեն ավելացնելու մասին խոսվեց, ես դրանից հետո վարչապետի հետ հանդիպել եմ և ասել, որ այդ թիվը փոքր է: Պետք է ձգտենք, որ ոլորտին շատ միջոցներ ուղղվեն:
– Վերջերս հայտարարել էիք, որ ՇՊՀ-ն գտնվում է բարոյահոգեբանական շատ վատ վիճակում: Այս պահին Դուք Շիրակի պետական համալսարանի հնարավոր լուծարումը տեսնու՞մ եք:
– Օգոստոսին հանդիպում կլինի պրոֆեսորադասախոսական կազմի հետ: Ես ուրախ եմ, որ իմ հայտարարությունից հետո առողջացման շարժ կա համալսարանում, մարդիկ սկսել են խոսել այն խնդիրների մասին, որոնք ունեին կառույցի ներսում:
– ՀՊՏՀ-ի ու Կոնսերվատորիայի Գյումրու մասնաճյուղերի տնօրենների մրցույթները չեն հայտարարվում: Ինչ եք կարծում, սա արդեն չի՞ ենթադրում, որ այս ու այլ բուհերի միավորում է լինելու:
– Միավորման գործընթացը մրցույթներ չհայտարարելու գործընթացի հետ կապ չունի: Այս հարցը միշտ եղել է քննարկումների կենտրոնում: Այն, որ միավորման ծրագիր քննարկվում է, չենք հերքի: Հայաստանի բուհերի այն ուռճացված թիվը, որը կա, մեծ է, և միավորումներ են լինելու:
– Պարո՛ն Հարությունյան, քանի որ Դուք նաև ՔՊ վարչության անդամ եք, մի քանի քաղաքական հարց. վերջին շրջանում քաղաքական հայտարարություններ չեք անում, սա ինչո՞վ է պայմանավորված:
– Զբաղվածությունը նախարարությունում, սա է հիմնական պատճառը: Հնարավորության դեպքում հետևում եմ քաղաքական զարգացումներին:
– Հայաստանի երկրորդ նախագահ Ռոբերտ Քոչարյանը, խոսելով ձեր իշխանության մասին, ասել է, որ իշխանության հարցը փողոցում է լուծվելու և առաջիկա աշնանը քաղաքական գործընթացներ են ծավալվելու: Սա ինչպե՞ս կմեկնաբանեք: Բացառո՞ւմ եք, որ առաջիկայում քաղաքական իրավիճակ է փոխվելու:
– Եթե խոսքը գնում է Ռոբերտ Քոչարյանի խոսքերին, ապա ցավում եմ, որ մարդիկ ընկել են հին ընդդիմադիր մտայնությունների մեջ ու առաջնորդվում են թեժ գարուն- թեժ աշուն հավաքածուներով: Ռոբերտ Քոչարյանը կոնսոլիդացման զրո հնարավորություն ունի, հատկապես այն դատավարությունների ֆոնին, որոնք տեղի են ունենում: Մենք ունենք ժողովրդի մեծամասնության աջակցությունը վայելող քաղաքական ուժ: Ավելի լավ է՝ Ռոբերտ Քոչարյանը մեծ ջանքեր գործադրի նախկինում իր կատարած քայլերը պարզաբանելու և դատավարությանն ավելի ակտիվ մասնակցելու համար:
Հարցազրույցն ամբողջությամբ՝ տեսանյութում:
Նարեկ Կիրակոսյան
