Ո՞ւմ է վերաբերվում ՓՊ ֆինանսական չարաշահումների մասին Արա Զոհրաբյանի ակնարկը

Փաստաբանների պալատի անդամ Տիգրան Աթանեսյանն արձագանքելով ՓՊ նախագահ Արա Զոհրաբյանի համերաշխության կոչին 2 տարբերակ է առաջ քաշում՝ ձևավորել երկրորդ պալատը, կամ գործող պալատում արմատական բարեփոխումներ կատարել, որոնք «կբացառեն Զոհրաբյանի և վերջինիս ենթակա խորհրդի իշխանական մենաշնորհը»։

Հիշեցնենք, որ օրեր առաջ Արա Զոհրաբյանը համերաշխության կոչով էր հանդես եկել՝ առաջարկելով նաև ընդդիմախոսների հետ ամեն ինչ սկսել նոր էջից՝ առանց հարաբերություններ պարզելու: Զոհրաբյանն իր կոչում նաև գրել էր, որ պատրաստ է հրապարակել փաստաբանների պալատի նախորդ ժամանակահատվածի ֆինանսական բոլոր մանրամասները, որոնք վերաբերում են իրեն և ընդդիմախոսներին։

Տիգրան Աթանեսյանն իր ֆեյսբուքյան գրառման տեքստում կոչի այս հատվածին չէր անդրադարձել։ Factor.am-ը փաստաբանից հետաքրքրվեց, թե ինչու ֆինանսական մանրամասներին չի անդրադարձել։ «Ես միշտ շատ հեռու եմ եղել կերակրատաշտից․ այդ մասն ինձ որևէ կերպ չէր կարող վերաբերվել: Ես որևէ ֆինանսական առնչություն չեմ ունեցել պալատի հետ՝ բացի անդամավճար տալուց։ Կոպիտ է հնչում, բայց թքած ունեմ՝ կարող է հրապարակել»,- ասաց նա։

Հարցին, թե ինչպես կարող է զուգահեռաբար երկու միություն գործել, Աթանեսյանը հիշեցրեց, որ 1998-ից մինչև 2005 թվականը երկու միություն էր գործում, և «արտակարգ վիճակ էր փաստաբանությունում»։

«Մարդը, երբ դառնում է փաստաբան, պետք է ընտրության հնարավորություն ունենա, թե որ միությանն անդամակցի, ինչ պայմաններով և այլն»,- նշեց նա։

Հիշեցնենք, որ սեպտեմբերի 9-ին կայացած Փաստաբանների պալատի նախագահի ընտրություններում 1002 ձայնով վերընտրվել էր առաջադրված միակ թեկնածուն՝ Արա Զոհրաբյանը։ Դիտարկմանը, թե մտահոգիչ չեն այդ թվերը, ինչպես կարող է գործել երկու պալատ, եթե այդքան փաստաբան իր ձայնն է տվել գործող նախագահին, Տիգրան Աթանեսյանը պատասխանեց․ «Մտահոգիչ թող լինեն իրեն ընտրողների համար, ինձ համար շատ կանխատեսելի էր և հստակ գիտեի, որ այդպես է լինելու։ Փաստաբանությունը բավականին տարբերվում է քանակային մոտեցումներից․ մեկ փաստաբան կա, որը կարող է մի ամբողջ պալատ արժենալ, ուստի կարևորը փաստաբանությունն է, որն Արա Զոհրաբյանն իր թիմով կործանում է»։

Փորձեցինք մեկնաբանություն խնդրել նաև Փաստաբանների պալատի նախագահ Արա Զոհրաբյանից, որը չցանկացավ անդրադառնալ փաստաբան Տիգրան Աթանեսյանի գրառմանը։ «Տիգրան Աթանեսյանի մեկնաբանություններին արձագանքելու անհրաժեշտություն չեմ տեսնում: Ես գործելու եմ իմ կարգախոսի համաձայն»,- Factor.am-ի հետ զրույցում ասաց Զոհրաբյանը։

Տեղեկացրինք, որ ըստ Աթանեսյանի՝ ֆինանսական մանրամասները չեն կարող իրեն վերաբերվել, ինչի հետ կապված Զոհրաբյանն արձագանքեց․ «Համերաշխության կոչիս մեջ նշված ֆինանսական մանրամասների վերաբերյալ հատվածը Տիգրան Աթանեսյանին չի վերաբերվում: Նա Փաստաբանների պալատի հետ ֆինանսական ուշագրավ գործարքներ չի կնքել»։ Խնդրեցինք անուններ հնչեցնել, սակայն Արա Զոհրաբյանն արձագանքեց, որ ավելացնելու ոչինչ չունի։

Սեդա Ղուկասյան