02.07.2026 | 06:06
ԱԱ-2026. ԱՄՆ-ի հավաքականը շարժվում է առաջ. ՏԵՍԱՆՅՈՒԹ
ԱՄՆ պատժամիջոցների տակ հայտնված ընկերությունից հերքում են՝ Իրանի հետ կապ չեն ունեցել
Տնտեսություն
14.08.2019 | 16:48
ԱՄՆ-ն Հայաստանից երկու ընկերության դեմ պատժամիջոցներ է սահմանել։ Այս մասին տեղեկանում ենք ԱՄՆ դաշնային ռեեստրի կայքում նախնական ռեժիմով հրապարակված փաստաթղթից: Պատժամիջոցները սահմանվել են «Մարկել» և «Երևանի կապի միջոցների գիտահետազոտական ինստիտուտ» (ԵԿՄԳՀԻ) ՓԲԸ-ների դեմ։ Ըստ հրապարակված փաստաթղթի՝ «Երևանի կապի միջոցների գիտահետազոտական ինստիտուտը» ապրանքներ է ձեռք բերել ԱՄՆ առևտրի նախարարության արդյունաբերության և անվտանգության բյուրոյի առևտրի վերահսկման ցանկից, և առանց բյուրոյի լիցենզիայի վերաարտահանել է այդ ապրանքները:
Բացի այդ, փաստաթղթում ասվում է, որ «Երևանի կապի միջոցների գիտահետազոտական ինստիտուտ» ՓԲԸ-ի գործադիր տնօրենը, որը նաև «Մարկել» ՓԲԸ-ի նախագահն է, գործնական հարաբերություններ է հաստատել ամերիկյան պատժամիջոցների տակ ընկած իրանական ընկերության հետ:
Factor.am-ը «Երևանի կապի միջոցների գիտահետազոտական ինստիտուտից» փորձեց պարզել ընկերության ղեկավարության դիրքորոշումը՝ ԱՄՆ պատժամիջոցների տակ հայտնվելու վերաբերյալ։ Ընկերությունից մեզ փոխանցեցին, որ տեղի ունեցածը թյուրիմացություն է
«Հաշվի առնելով ստեղծված իրավիճակը կապված ԵՐԿՄԳՀԻ ՓԲ ընկերության՝ ԱՄՆ առևտրի նախարարության կողմից «սև ցուցակում» ընդգրկելու վերաբերյալ, հայտնում ենք, որ տեղի է ունեցել թյուրիմացություն։ ԵրԿՄԳՀԻ ՓԲԸ որպես Ձեռնարկություն երբեք չի ունեցել որևէ առևտրային կապ Իրանի Իսլամական Հանրապետության այս կամ այն կազմակերպությունների հետ։ ԵրԿՄԳՀԻ և ՄԱՐԿԷԼ ՓԲ ընկերությունները ունեն տարբեր ուղղվածություններ և լուծում են տարբեր խնդիրներ»,-հայտնեցին մեզ ընկերությունից՝ հույս հայտնելով, որ շուտով բոլոր այս հարցերը կստանան պարզաբանում և առաջացած խնդիրները կլուծվեն։
Աղավնի Սուքիասյան
