19.03.2026 | 23:17
Էստոնիան մեղադրել է Ռուսաստանին օդային տարածքի խախտման համար
Անկախությանը նվիրված զորահանդես չի լինի․ ՀՀ ՊՆ
19.09.2017 | 15:11
Հայաստանի անկախության 26-ամյակին նվիրված տոնակատարությունների շրջանակում սեպտեմբերի 21-ին զորահանդես նախատեսված չէ։ Այս մասին տեղեկանում ենք Factor.am-ի կողմից Պաշտպանության նախարարություն ուղարկված գրավոր հարցման պատասխանից։
«Անկախության 26-ամյակին նվիրված տոնակատարությունների շրջանակներում զորահանդես, սպառազինության և ռազմական տեխնիկայի ցուցադրություն, օտարերկրյա պաշտպանական գերատեսչությունների այցեր նախատեսված չեն»,- ասված է ՊՆ պատասխանում։
Հարցման տեքստում խնդրել էինք հստակեցնել՝ 200 մլն ԱՄՆ դոլար վարկային համաձայնագրով ՌԴ-ից ձեռք բերված սպառազինությունից որոշ տեսակներ հնարավո՞ր է ցուցադրվեն անկախության օրվան նվիրված տոնական միջոցառումների շրջանակում։
Հիշեցնենք, որ օրեր առաջ Պաշտպանության փոխնախարար Դավիթ Փախչանյանը հայտարարել էր, որ վերոնշալ սպառազինության մատակարարումն ավարտական փուլում է։ Նախորդ տարի՝ անկախության 25-ամյակին նվիրված զորահանդեսի ժամանակ առաջին անգամ ցուցադրվեցին «Իսկանդեր» օպերատիվ-մարտավարական հրթիռային համալիրներն ու «Սմերչ» համազարկային կրակի ռեակտիվ համակարգերը։
Ամենայն հավանականությամբ նախագահ Սարգսյանն այս տարի անկախության օրը Հայաստանում չի լինի․ ըստ պաշտոնական հաղորդագրության՝ Սարգսյանը սեպտեմբերի 18-ի երեկոյան մեկնել է Նյու Յորք՝ մասնակցելու ՄԱԿ-ի Գլխավոր Ասամբլեայի 72-րդ նստաշրջանին։ Նստաշրջանի շրջանակներում Նալբանդյան-Մամեդյարով հանդիպման երկուստեք համաձայնությունն արդեն իսկ ձեռք է բերվել։ Չի բացառվում, որ կլինի նաև Սարգսյան-Ալիև հանդիպում։
Ի դեպ, ըստ նախագահի պաշտոնական կայքի հաղորդագրության՝ Նյու Յորքում բացի ՄԱԿ-ի գլխավոր քարտուղար Անտոնիո Գուտերեշի հետ հանդիպումից նախատեսված են Սերժ Սարգսյանի այլ երկկողմ հանդիպումներ:
Սեդա Ղուկասյան
