15.01.2026 | 12:08
ԵՄ-ն ողջունում է Ադրբեջանի կողմից հայ գերիների ազատ արձակումն ու Հայաստանին փոխանցումը
Մարտի 1-ի գործով սպանության համար մեղադրվողի պաշտպանն ակնկալում է, որ քրեական հետապնդումը կդադարեցվի․ ՏԵՍԱՆՅՈՒԹ
Հասարակություն
05.08.2019 | 18:31
Մարտի 1-ի տասը սպանությունները շարունակում են մնալ չբացահայտված։ Երկու ամիս առաջ հայտարարվեց, որ սպանություններից մեկի կասկածանքով մեկ անձ ձերբակալվել է, որը հետագայում նաև կալանավորվեց։
Մինչ տարբեր կարծիքներ էին հնչում, որ սառույցը տեղից շարժվում է, և ՀՔԾ-ին կհաջողվի 11 տարի առաջ կատարված սպանությունների հանգամանքներն ու պատասխանատուներին ջրի երես հանել, երեկ հայտնի դարձավ, որ Մարտի 1-ի գործի շրջանակում սպանության մեղադրանքով կալանավորված Գեղամ Պետրոսյանն ԱԱԾ մեկուսարանից ազատ է արձակվել։ Ավելին, այս գործով փաստաբան Վաղարշակ Գևորգյանը Factor.am-ի հետ զրույցում չբացառեց, որ այս քրեական գործն առաջիկայում կկարճվի:
«Կարծում եմ, որ վարույթն իրականացնող մարմինը որոշում կկայացնի քրեական հետապնդումը դադարեցնելու մասին, որովհետև ձեռք բերված ապացույցները բավարար չեն, որոնք վարույթն իրականացնող մարմնին հնարավորություն կտան պահպանել մեղադրանքը»,- ասաց փաստաբանը:
Գեղամ Պետրոսյանը 2008 թվականի Մարտի 1-ի դրությամբ եղել է ՀՀ ոստիկանության զորքերի հրամանատարի տեղակալը։ Նա մեղադրվում է ցուցարար Զաքար Հովհաննիսյանի սպանության համար, մինչդեռ Պետրոսյանն առաջադրված մեղադրանքը չի ընդունում։
Պաշտպանը պնդեց՝ ՀՔԾ-ն քրեական գործ հարուցելիս դրսևորել է շտապողականություն. «Կարծում եմ՝ շտապողականությունը հանգեցրեց նրան, որ առաջադրվեց մեղադրանք, որը, իմ համոզմամբ, անհիմն է»: 2008 թվականի Մարտի 1-ի դեպքերի ընթացքում սպանված 31-ամյա Զաքար Հովհաննիսյանը վիրավորվել էր Մաշտոցի պողոտայում տեղի ունեցած բախումների ժամանակ: Նա տեղափոխվել է հիվանդանոց, բայց վիրահատվելուց հետո գիտակցության չգալով՝ մահացել է: Փաստաբան Վաղարշակ Գևորգյանն ասաց, որ սպանության օրը Գեղամ Պետրոսյանը գտնվել է Լեոյի փողոցում, և նրան նման մեղադրանք չէր կարող առաջադրվել։
Պաշտպանը Factor.am-ին հայտնեց նաև, որ փորձաքննության ընթացքում հետազոտվել են պարկուճները, և նույնականացում չեն հայտնաբերել սպանվածի մարմնում առկա փամփուշտի և Գեղամ Պետրոսյանի հրազենի փամփուշտների միջև։ Ասաց՝ մեկ ցուցմունքի հիման վրա նման քրեական գործի հարուցումը բացարձակ անհիմն է: Իրավապաշտպան Վարդան Հարությունյանը ողջունելի է համարում այն, որ ստեղծված իրավիճակում ՀՔԾ-ն անձին կրկին կալանավորելու միջնորդությամբ հանդես չի եկել:
«Սա ցույց է տալիս, որ նպատակը ոչ թե անպայման ինչ-որ աշխատանք ցույց տալն է, այլ օրենքի տառին և ոգուն համապատասխան առաջ գնալն ու գործի բացահայտմանը հասնելը: Իսկ եթե նախկինում լիներ, ապա կստեղծեին արհեստական խոչընդոտներ՝ անձի ազատ արձակումը թույլ չտալու համար»,- ասաց Վարդան Հարությունյանը:
Իրավապաշտպանը, սակայն, ՀՔԾ-ին հուշում է, որ որքան ժամանակն անցնում է, այնքան ավելի է քչանում Մարտի 1-ի սպանությունները բացահայտելու հնարավորությունը։ Մարտի 1-ի գործի բուն բացահայտմանն ուղղված քայլերի մասին Հարությունյանն ասաց՝ ընթացքը դանդաղ է, բայց որոշակի տեղաշարժ կա։
Մանրամասները՝ տեսանյութում:
Լիլիթ Շաբոյան
