ԱՄՆ-ում մեկ օրում հրաձգության երեք դեպք է գրանցվել, մի քանի տասնյակ զոհ կա

ԱՄՆ-ում մեկ օրվա ընթացքում հրաձգության երեք դեպք է գրանցվել: Թեխաս նահանգի «Walmart» առևտրի կենտրոնում զինված հարձակման հետևանքով 20 մարդ է զոհվել, 26-ը՝ վիրավորվել, գրում է ՌԻԱ Նովոստին:

Տուժածներից շատերը ծանր վիճակում են գտնվում։ Հրաձիգը ձերբակալվել է:

Ավելի ուշ հրաձգություն է տեղի ունեցել Օհայո նահանգում, որի հետևանքով 9 մարդ զոհվել է, 26-ը՝ վիրավորվել։

Եվս մեկ հրաձգություն էլ տեղի է ունեցել Չիկագոյի մանկական խաղահրապարակում: Այս դեպքում 7 մարդ վիրավորվել է: Անհայտ անձը կրակ է բացել սև «Chevrolet Camaro» մակնիշի մեքենայից:

Զանգվածային սպանություններից հետո ԱՄՆ ոստիկանությունը մեծացրել է փողոցային պարեկների թիվը: Իրավապահներն ուժեղացված ծառայությունը կշարունակեն այնքան, մինչև երկրում դրությունը կարգավորվի։

Իրավապահները քաղաքացիներին զգուշացրել են, որ փողոցներում ոստիկանության աշխատակիցների թվի ավելացումն անհրաժեշտ է՝ հնարավոր վտանգների կանխման համար, և նրանց խնդրել են ոստիկանական մեծաքանակ խմբեր տեսնելիս խուճապի չմատնվել:

CNN-ի փոխանցմամբ՝ ԱՄՆ նախագահ Դոնալդ Թրամփը կարգադրել է մինչև հինգշաբթի՝ օգոստոսի 8-ը, ԱՄՆ դրոշները վայր իջեցնել բոլոր հանրային շենքերում, զինվորական դիտակետերում և արտասահմանում տեղակայված օբյեկտներում:

Նա հրաձգությունները վախկոտության դրսևորում է անվանել՝ հավելելով, որ կիսում է ողբերգական պատահարների հետևանքով տուժածների ցավը։

Նելլի Մելքոնյան