22.05.2026 | 23:50
Անդրանիկ Թևանյանի նկատմամբ հարուցվել է քրեական հետապնդում պետական դավաճանության հանցակազմի հատկանիշներով
Մեծ Բրիտանիան դեռևս չունի Եվրոպական միությունից դուրս գալու համար հարթ ուղի
Քաղաքականություն
28.07.2019 | 13:41
Բորիս Ջոնսոնը Մեծ Բրիտանիայի վարչապետի պաշտոնում նշանակվելուց անմիջապես հետո սկսեց կառավարության կազմի արագ փոփոխություն` այն ազատելով իր մրցակիցներից ու պաշտոններ հանձնելով իր հավատարիմներին ու Բրեքզիթի կողմնակից քաղաքական գործիչներին. գրում է VOA-ն:
Խորհրդարանի առջեւ իր առաջին ելույթում նա խոստացավ Մեծ Բրիտանիան ամեն պարագայում դուրս բերել Եվրոպական միության կազմից հոկտեմբերի 31-ին, ու հայտարարեց, որ հակառակ դեպքում քաղաքական համակարգի նկատմամբ կգրանցվի վստահության կորուստ:
Ջոնսոնը խոստանում է Բրեքզիթից հետո «ոսկե դար» Մեծ Բրիտանիայի համար: Նա հույս ունի, որ Եվրոպական միությունը կվերանայի կնքված համաձայնագրում փոփոխություններ իրականացնելու հարցում իր մերժողական դիրքերը: ‘’Իսկ եթե չհամաձայնի, Միացյալ Թագավորությունը դուրս կգա առանց համաձայնության’’, ասել է նա:
Այս վերջնագրային տեսք ունեցող հայտարարությունն առաջ է բերել քննադատության ալիք ընդդիմության կողմից եւ Եվրոպայում:
Հարցն այն է, որ խորհրդարանն արդեն երեք անգամ մերժել է առանց գործարքի դուրս գալու Ջոնսոնի նախորդի` Թերեզա Մեյի առաջարկները: Ջոնսոնն այդ պատճառով չի բացառում դուրսբերումն իրականացնել խորհրդարանի աշխատանքները կասեցնելու եղանակով, ինչը կարող է դառնալ սահմանադրական խնդիրների պատճառ: Այդ պատճառով էլ շատերն են կարծում, որ Ջոնսոնի համար քաղաքական ճահճից դուրս գալու միակ ուղին նորից ժողովրդին դիմելու ուղին է, այսինքն` ընտրությունները:
Եվրոպական միությունը կարող է ընտրությունների կապակցությամբ համաձայնել մեկ անգամ եւս հետաձգել Բրեքզիթը: Սակայն հարցումները ցույց են տալիս, որ հասարակությունը Բրեքզիթի հարցում բաժանված է երկու հավասար մասերի:
Այնպես որ, Մեծ Բրիտանիան ունի նոր կառավարություն, սակայն չունի քաղաքական այս ճգնաժամից դուրս գալու նոր հնարավորություններ:
