08.09.2026 | 23:30
Պապիկյանը այցելել է ՊՆ ուսումնական կենտրոն, հրամկազմին տրվել են մի շարք հանձնարարականներ
«Համազգայինի ուսանողական ֆորում-2019»-ի շրջանակում աշխարհի տարբեր երկրների մի խումբ ուսանողներ Արցախ են այցելել
27.07.2019 | 14:24
Համազգային հայ կրթական և մշակութային միության նախաձեռնած «Համազգայինի ուսանողական ֆորում-2019» ծրագրի շրջանակում եռօրյա այցով աշխարհի տարբեր երկրներից Արցախում է շուրջ 35 երիտասարդ: Այս մասին տեղեկացնում է «Արցախպրես»-ը:
«Համազգայինի ուսանողական ֆորում-2019» ծրագրի մասնակիցներն այսօր՝ հուլիսի 27-ին այցելել են Ստեփանակերտի «Ղարաբաղ կարպետ» գորգագործական ընկերություն: Կառույցի տնօրեն Սևակ Խաչատրյանը հավաքի մասնակիցների հետ խոսել է «Ղարաբաղ կարպետ» ընկերության գործունեության, ինչպես նաև ձեռքբերումների մասին:
Համազգային հայ կրթական և մշակութային միության Արցախի գրասենյակի տնօրեն Հերմինե Ավագյանի խոսքով՝ «Համազգայինի ուսանողական ֆորում-2019» ծրագիրը գործում է արդեն 25 տարի: Նպատակն աշխարհի տարբեր երկրներում ապրող ուսանողների համախմբումն ու հայրենաճանաչողական այցեր կազմակերպելն է:
«Ծրագրի շրջանակում սփյուռքահայ երիտասարդները հնարավորություն են ունենում մոտիկից տեսնելու և ճանաչելու Մայր հայրենիքի պատմաճարտարապետական հուշարձաններն ու վայրերը, շփվել մշակութային գործիչների հետ, կազմակերպել դասախոսություններ և զրույցներ: Կայցելենք Շուշի, Գանձասար, Նիկոլ Դումանի տուն-թանգարան, կշրջենք Ստեփանակերտով, կայցելենք զորամասեր և այլն: Ծրագիրը երկշաբաթյա է, որի վերջին երեք օրն անցկացվում է Արցախում»,- նշել է Հերմինե Ավագյանը: Նա ընդգծել է, որ ծրագիրը յուրովի կամուրջ է Հայաստան-Արցախ-Սփյուռք համագործակցության ընդլայնման գործում:
Մանրամասները՝ սկզբնաղբյուր կայքում
