22.04.2026 | 16:07
Մինչ այս պահը 3 կուսակցություն է ընտրություններին մասնակցելու փաստաթուղթ ներկայացրել. ԿԸՀ խոսնակ․ ՏԵՍԱՆՅՈՒԹ
«Եթե կրթական ծրագրի բաղադրիչներից մեկն արդյունավետ չէ, ծրագիրը խնդիրներ է ունենում». կրթության փորձագետ.ՏԵՍԱՆՅՈՒԹ
Հասարակություն
23.07.2019 | 16:26
Համաշխարհային բանկի և պետական բյուջեի ֆինանսավորմամբ 2014 թվականից իրականացվող կրթության բարելավման ծրագրի շրջանակում իրականացրել ենք կրթության և գիտության բյուջետային ծախսերի արդյունավետության գնահատում և մոնիթորինգ։ Այս մասին այսօր «Կրթության և գիտության բյուջետային ծախսերի արդյունավետության գնահատման և մոնիթորինգի արդյունքները 2019թ․ երկրորդ եռամսյակին» թեմայով ասուլիսի ընթացքում նշեց «Հանրային քաղաքականության հետազոտությունների ազգային կենտրոն» ՀԿ-ի կրթության փորձագետ Արմեն Քթոյանը։
Նրա խոսքով՝ ուսումնասիրել են մի քանի հիմնական ծրագիր, որոնց թվում՝ նախադպրոցական հաստատությունների ստեղծման ծրագիրը։ «Երեխաների երկու երրորդը մինչև դպրոց գնալը կրթություն չի ստանում, և սա հետագայում հնարավորություն չի տալիս առավելագույնս բացահայտել ոլորտը»,- նշեց Քթոյանը։
Նրա խոսքով՝ նախապես որոշված էր, որ մինչև 2019-ի սեպտեմբեր պետք է 120 նախադպրոցական հաստատություն ստեղծվեր, ուր 5-6 տարեկան 2400 երեխա պետք է հաճախեր։
«Այս պահին 97 նախադպրոցական հաստատություն կա կառուցված։ Ծրագիրը երկարաձգվել է մինչև 2021 թվականը։ Այդ ժամկետում նախատեսվում է 134 մանկապարտեզ կառուցել»,- ասաց Քթոյանը։
Կրթության փորձագետը նաև 2019 թվականի սկզբի դրությամբ վերանորոգվող 17 դպրոցներից խոսեց՝ նշելով, որ տարեսկզբից դեռ 5 ավագ դպրոց է շահագործման հանձնվել։
«Թերակատարումներից մեկն այն է, որ ծրագիրը վերանայվեց և ժամկետները երկարացվեցին։ Այժմ 2021 թվականի համար թիրախը ևս 12 դպրոցի կառուցումն է»,- նշեց Արմեն Քթոյանը։
Կրթության փորձագետի խոսքով՝ եթե կրթական ծրագրի բաղադրիչներից մեկն արդյունավետ չէ, ծրագիրը խնդիրներ է ունենում։
Քթոյանն անդրադարձավ նաև անապահով ընտանիքների երեխաների ուսման վարձի փոխհատուցմանը՝ նշելով, որ պետությունը հաճախ վճարում է այն երեխաների համար, որոնք իրականում վճարունակ են։
«Պետք է ավելի լավ ուսումնասիրել այն երեխաներին, որոնք դիմում են ուսման վարձի փոխհատուցում ստանալու համար։ Շատ հաճախ նրանք ի վիճակի են վճարել և պետությունն իր գումարը նրանց է տալիս՝ ավելի անապահով պայմաններում գտնվող երեխաների փոխարեն»,- ընդգծեց Արմեն Քթոյանը։
Խոսելով իրականացված մոնիթորինգից, փորձագետը նշեց, որ դրա համար 160 միլիոն դրամ է օգտագործվել։
Քթոյանը հավելեց նաև, որ Հայաստանը գիտահետազոտական ինստիտուտների որակի ուսումնասիրման վարկանիշային ցուցակում այս տարի 88-րդն է՝ առաջ անցնելով Թուրքիայից, Վրաստանից, Մոլդովայից և Ղրղզստանից։
Մանրամասները՝ տեսանյութում:
Նելլի Մելքոնյան
