30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
Իսրայելցի զինվորականները սկսել են քանդել պաղեստինյան գյուղի տները
Քաղաքականություն
22.07.2019 | 12:29
Իսրայելի Պաշտպանության բանակի զինծառայողները սկսել են քանդել Երուսաղեմի մերձակայքում գտնվող Սուր Բահիր պաղեստինյան գյուղի տները: Դրանք գտնվում են անվտանգության պատի անմիջական հարևանությամբ: Այս մասին գրում է ՏԱՍՍ-ը՝ վկայակոչելով The Times of Israel-ը:
Նշվում է, որ զինվորականները մտադիր են քանդել 10 շինություն, որոնցում 72 բնակարան կա: Միաժամանակ, Հորդանան գետի Արևմտյան ափին տարբեր շրջաններում շրջայցերի արդյունքում իսրայելցի զինվորականները 19 հետախուզվող պաղեստինցու են ձերբակալել:
The Times of Israel-ի տեղեկացմամբ՝ Իսրայելը որպես շինությունների քանդման պատճառ նշում է այն, որ դրանք շատ մոտ են անվտանգության պատին: Ընդ որում՝ շենքերի մի մասը դեռևս կիսակառույց է:
Իրավապաշտպանները փորձել են խոչընդոտել Սուր Բահիրում տների քանդմանը և հայց են ներկայացրել Իսրայելի Արդարադատության բարձրագույն դատարան, սակայն անցյալ շաբաթ հայցը մերժվել է:
Իսրայելն անվտանգության պատը սկսել է կառուցել 2005 թվականին: Դրա կառուցման հիմնական նպատակը, ըստ իսրայելական կողմի, հրեական պետության տարածք պաղեստինցի ահաբեկիչների ներթափանցումը կանխելն է: Պաղեստինցիներն իրենց հերթին կարծում են, որ իսրայելցիներն այդպիսով փորձում են ինքնուրույն և առանց բանակցությունների սահմաններ գծել:
