13.08.2026 | 01:00
ՊՍԺ-ն` Եվրոպայի Սուպերգավաթի հաղթող. ՏԵՍԱՆՅՈՒԹ
Վահե Գրիգորյանն իր նամակով ՀՀ իշխանությանը մեղադրում է 1 տարվա անգործության մեջ. Նորայր Նորիկյան. ՏԵՍԱՆՅՈՒԹ
Քաղաքականություն
09.07.2019 | 18:00
Փաստաբան Նորայր Նորիկյանը Factor.am-ի հետ զրույցում անդրադառնալով սահմանադրական ճգնաժամի մասին Վահե Գրիգորյանի հայտարարությունից հետո ստեղծված իրավիճակին, երբ Հրայր Թովմասյանը հայտարարեց, որ ՍԴ նախագահն ինքն է ու ոչ մի ճգնաժամ չկա, ասաց, որ գնդակը գտնվում է ՀՀ կառավարությունում, ԱԺ-ում ու դատավորների ընդհանուր ժողովում:
«Վահե Գրիգորյանի նամակից պարզ է դառնում, որ ակնկալվում է այս 3 իրավասու մարմինների դիրքորոշումը ՍԴ շուրջ ստեղծված իրավիճակի հաղթահարման կապակցությամբ»,- ասաց փաստաբանը՝ հավելելով, որ իրավիճակը հանգուցալուծում է ենթադրում, քանի որ հնարավոր չէ այսպես երկար շարունակվել: «Իմ ներքին համոզմամբ՝ այդ դատարանում կա՛մ պետք է մնա Վահե Գրիգորյանը, կա՛մ Հրայր Թովմասյանը»:
Նշենք, որ Վահե Գրիգորյանն իր նամակում ելքեր էր առաջարկել. կա՛մ համատեղ որոշմամբ պահպանել ներկա իրավիճակը, կա՛մ 7 թափուր հաստիքների համար նախագահը, Դատավորների ընդհանուր ժողովն ու Կառավարությունը խորհրդարանին թեկնածուներ են ներկայացնում: Իսկ երրորդ տարբերակում Գրիգորյանն ակնարկել էր Սահմանադրական դատարանի դատավորների հրաժարականի մասին՝ առաջարկելով, որ այդ դեպքում գործի վաղ կենսաթոշակային սխեմա:
«Արդյո՞ք խնդիրը Սահմանադրական դատարանի մեջ է, այլ ոչ թե Սահմանադրության»,-հարց ուղղեց փաստաբանը։ Նրա խոսքով՝ ՍԴ խնդիրը բարձրաձայնելուց առաջ ավելի ճիշտ կլիներ արձանագրել, որ 1 տարի շարունակ Կառավարությունն ու ԱԺ-ն այս հարցին պատասխան չեն տվել: «Հարկ է պարզել՝ Վահե Գրիգորյանին ե՞րբ է հայտնի դարձել ՍԴ դատավոր և անդամ եզրույթների տարբերությունը։ Որովհետև Վահե Գրիգորյանն իր նամակով ՀՀ կառավարությանը, նախագահին ու ԱԺ-ին մեղադրում է անգործության մեջ, ասում է՝ դուք պարտավոր էիք 1 տարվա ընթացքում մրցույթ հայտարարել ՍԴ 7 թափուր պաշտոնների համար»,- նշեց փաստաբանը։
ՀՀԿ-ն վերջերս Սահմանադրության օրվա առիթով «Արտարակի ձոր» ռեստորանում խնջույք արեց ու հայտարարեց, որ պաշտպանելու է Սահմանադրությունը։ «Գործող Սահմանադրության հեղինակները պետք է պատասխանատվության ենթարկվեն՝ մեր հանրությանը նման Սահմանադրություն հրամցնելու համար, բայց խնդիրը Հրայր Թովմասյանին սրա համար պատասխանատվության ենթարկելու մեջ չէ, այլ ասում են՝ Հրայր Թովմասյան, դու լեգիտիմ չես»,- նշեց Նորիկյանը՝ հավելելով. «Մեր գլոբալ խնդիրները թողած՝ զբաղված ենք արհեստական ճգնաժամեր ստեղծելու գործով»։
Նրա խոսքով՝ նույն Սինգապուրում, որտեղ այս օրերին գտնվում է վարչապետը, նախկին ռեժիմի ներկայացուցիչներին պատժեցին հանցագործությունների համար։ «Բայց ես այսօր տեսնում եմ մարդկանց, որոնք իրավունք չունեին խոսելու քաղաքական հավակնությունների մասին, մինչդեռ քաղաքական հայտ են ներկայացնում ու ձևակերպում»,- նշեց փաստաբանը՝ հավելելով, որ դրա պատճառը հանցավոր ռեժիմի ներկայացուցիչներին պատասխանատվության չենթարկելն է, մինչդեռ նման խոստումներով է հեղափոխություն արել հանրությունը։
Հարցազրույցն ամբողջությամբ՝ տեսանյութում։
Մարինե Խառատյան
