Քաղաքականություն
05.07.2019 | 20:10Փաստաբան Սեդա Սաֆարյանը 2015-ին ընդունված Սահմանադրության մեջ շատ բան չէր փոխի, բայց այստեղ մի թերություն ակնհայտ է։ «Հիմնականում վարչապետի ձեռքն է կենտրոնացված իշխանությունը»,- ասում է տիկին Սաֆարյանը։
Փաստաբանը շատ կողմերով այս Սահմանադրությունը համարում է հաջողված, պարզապես այն դեռևս չի դառնում ժողովրդինը, ահա ինչու այդքան հեշտ է այն փոփոխելը։ «Մեր պարագայում շատ շուտ-շուտ փոփոխվեցին։ Եվ դա նաև մեր անկայունության, մեր հասարակական ցնցումների մասին է խոսում»,-արձանագրում է փաստաբանը։
Իրավաբան Արթուր Ղազինյանը հաստատ կփոխեր այս Սահմանադրությունը, խորհրդարանական կառավարումը մեր ժողովրդի մտածելակերպի հետ չի խոսում։
«Այսինքն, եթե մարդիկ անձերով են դատում, օրինակ, հարցնում են էսինչ կուսակցությունը, անմիջապես հարցնում են՝ ո՞վ է անձը, միևնույն է անձնավորված է մեր հասարակությունը։ Էդ դեպքում մենք ինչի՞ ենք հոսանքին հակառակ գնում, երբ կարանք հոսանքին համընթաց գնալ և բնական երևույթները բերել օրգանապես դարձնել սահմանադիր»,- պարզաբանում է իրավաբանական գիտությունների թեկնածու Արթուր Ղազինյանը։
Պարոն Ղազինյանը, այնուամենայնիվ, չէր ցանկանա, որ անընդհատ Սահմանադրություն խմբագրվի կամ փոխվի, դա պետք է արվի ևս մեկ անգամ, բայց այնպես, որ հաջորդ մի քանի իշխանությունները երկրի հիմնական օրենքին մատով չկպնեն:
«Պետք է երաշխավորել, որ առնվազն 20 տարի չենք վերադառնալու սահմանադրական կոնցեպտուալ դրույթներին կամ այն հոդվածները, որոնք համարում ենք անփոփոխելի, Սահմանադրության մեջ կամրագրենք, որ դրանք փոփոխման ենթակա չեն»,- ասում է իրավաբանը։
Սահմանադրագետ Վարդան Այվազյանն էլ չէր ուզենա, որ ամեն իշխանություն իր Սահմանադրությունը գրի։ Ինքը գործող Սահմանադրության դեմ ոչինչ չունի, ուղղակի այստեղ շատ բան խեղաթյուրված է։
«Ազգ, ժողովուրդ, դրանց հստակեցումը չկա Սահմանադրության մեջ, կամ ժողովրդին պատկանող իշխանության իրականացման կառուցակարգերը հստակեցված չեն, և այն, ինչի արդյունքում տեսնում եք՝ ցանկացած փողոցային շարժում բնութագրվում է որպես ժողովրդին պատկանող իշխանության իրականացում, ինչը ամբողջովին խեղաթյուրում է դրա իմաստը»,- ասում է ԵՊՀ Սահմանադրական իրավունքի ամբիոնի վարիչ Վարդան Այվազյանը։
Սահմանադրագետն էլ է խնդիր տեսնում սուպերվարչապետության հետ։ Ըստ նրա, երկրի հիմնական տեքստում անորոշ են նաև Ազգային ժողովի արձակման մեխանիզմները․ «Այս առումով լուրջ վերանայման կարիք ունի, լուրջ փոփոխությունների, ինչպես նաև քաղաքական ճգնաժամերի հաղթահարման առումով գործող Սահմանադրությունը փոփոխված որևէ լուրջ կառուցակարգ չի նախատեսում, ասենք, ԱԺ ազատ արձակման առումով, խորհրդարանական մեծամասնության փլուզման արդյունքում կառավարության հետագա ճակատագրի առումով և այլն»։
Մանրամասները՝ տեսանյութում:
Մհեր Արշակյան
