13.08.2026 | 01:00
ՊՍԺ-ն` Եվրոպայի Սուպերգավաթի հաղթող. ՏԵՍԱՆՅՈՒԹ
ՔԿ-ն ձեռնարկելու է անհրաժեշտ բոլոր քայլերը՝ Գագիկ Ծառուկյանին հարցաքննության հրավիրելու համար․ ՔԿ խոսնակ
Հասարակություն
18.06.2019 | 11:57
Ազգային ժողովի «Բարգավաճ Հայաստան» խմբակցության ղեկավար Գագիկ Ծառուկյանն այսօր՝ ժամը 18:30-ին, հրավիրված է Քննչական կոմիտե հարցաքննության։ Այս մասին Factor.am-ին փոխանցեց Քննչական կոմիտեի լրատվության բաժնի պետ Նաիրա Հարությունյանը։
Այսօր ավելի վաղ, Ծառուկյանն Ազգային ժողովում հայտարարեց՝ Քննչական կոմիտե ներկայանալու կարիք չի տեսնում։
«Նախաքննական մարմինը շարունակելու է ձեռնարկել անհրաժեշտ բոլոր քայլերը Գագիկ Ծառուկյանին հարցաքննության հրավիրելու համար»,- մեր հարցին ի պատասխան նշեց Հարությունյանը՝ հավելելով, որ Ծառուկյանի՝ ՔԿ չներկայանալու հայտարարության առնչությամբ հանդես կգան հայտարարությամբ։
Հիշեցնենք, որ Աբովյանի ընտրությունների նախօրեին «Քաղաքացիական պայմանագիր» կուսակցության քաղաքապետի թեկնածուի նախընտրական շտաբի ղեկավարի ավտոմեքենայի հրկիզմանն անդրադառնալով՝ Ծառուկյանն ասել էր՝ «դա սարքած գործ է»։ Այս հայտարարությունից հետո Քննչական կոմիտեն հարցաքննության նպատակով ծանուցագիր էր ուղարկել Գագիկ Ծառուկյանին, իսկ ավելի ուշ ՔԿ-ից պաշտոնապես հայտնեցին, որ Ծառուկյանը պատռել է ծանուցագիրը։
Ի դեպ, Քննչական կոմիտեի խոսնակը նաև տեղեկացրեց, որ Ծառուկյանի փաստաբանից քննչական մարմինը ստացել է գրություն, որտեղ նշված է, որ տեղի ունեցածի վերաբերյալ Ծառուկյանն ընդամենը իր կարծիքն է հայտնել։
Շողիկ Գալստյան
