Գիտեմ, որ գործընթացը կա. Վահագն Հովակիմյանը՝ իրավապահների կողմից Ռոբերտ Քոչարյանի ունեցվածքի բացահայտման մասին. ՏԵՍԱՆՅՈՒԹ

Factor.am-ի հարցազրույցը «Իմ քայլը» խմբակցության պատգամավոր, «Քաղաքացիական պայմանագիր» կուսակցության նորընտիր վարչության անդամ Վահագն Հովակիմյանի հետ

– Պարո՛ն Հովակիմյան, երեկ տեղի ունեցավ «Քաղաքացիական պայմանագիր» կուսակցության 5-րդ համաժողովը, որի ժամանակ ընտրվեցին վարչության անդամներ և նախագահ։ Ինչո՞ւ հերթական անգամ Նիկոլ Փաշինյանը չցանկացավ դառնալ վարչության նախագահ, նախագահ ընտրվեց Սուրեն Պապիկյանը։

– «Քաղաքացիական պայմանագիր» կուսակցությունն իր հիմնադրման պահից մի սկզբունք է հռչակել՝ դա սուպերլիդերության մերժումն է: Եթե նայեք ՔՊ-ի 4 տարիների պատմությունը, կուսակցության կառավարման, կուսակցաշինության  գործընթացը միշտ գնացել է այն ուղով, որ հնարավորություն ստեղծվի նոր քաղաքական դեմքեր, քաղաքական առաջնորդներ կազմավորել: Սուպերլիդերության խնդիրն այն է, որ մեկը ստանձնում է ամբողջ պատասխանատվությունը: Այդպիսով՝ մի կողմից փակվում կամ գոնե նվազեցվում է նոր առաջնորդների ձևավորման դաշտը, մյուս կողմից՝ սուպերլիդերը կարող է հայտնվել ծանր վիճակում, երբ նա, ըստ էության, կարող է վերցնել բեռ, որը չկարողանա իրացնել: Մեր կուսակցությունում ամեն ինչ թիմային է:

– Դուք ասում եք՝ սուպերլիդերության մերժում, բայց Նիկոլ Փաշինյանին քննադատում են նրանում, որ նա չցանկացավ հրաժարվել սուպերվարչապետության լծակներից: Սուպերլիդերություն կա գործադիրում, իսկ կուսակցությունում՝ ո՞չ:

– Դուք որևէ տեղ տեսել եք, որ վարչապետն ամեն ինչ միանձնյա՞ է որոշում: Այստեղ ոչ թե խնդիր է, թե մարդիկ ինչպես են հասկանում Սահմանադրության գրածը, այլ ինքը՝ վարչապետը, ինչպես է դա իրացնում: Եթե պաշտոնյան, վարչապետն ինքը ցանկանա լինել միանձնյա կառավարող, ուզում եք՝ դնենք Սահմանադրությունը խմբագրենք, միևնույն է, ի վերջո հասնելու է դրան:

– Մինչև հեղափոխությունն այդ Սահմանադրությունը և վարչապետի համար նրա ընձեռած հնարավորությունները սուպեր էր որակում նաև Նիկոլ Փաշինյանը: Այսինքն՝ Նիկոլ Փաշինյանն ունի սուպերլիդերության հնարավորությունը, բայց չի՞ ստանձնում:

– Եթե ուշադրություն դարձնեք, կտեսնեք, որ փաստացի այս ընթացքում որոշումներ կայացնելու գործիքակազմը հնարավորինս տրամադրում է իշխանության տարբեր ճյուղերի: Օրինակ՝ ՏՄՊՊՀ-ի և ՀԾԿՀ-ի նախագահին և անդամներին առաջադրելու իրավունքը, գործող օրենսդրությամբ, տրված է վերապահված է վարչապետին: Այսօր մեր հանձնաժողովը հավանության արժանացրեց Արարատ Միրզոյանի հեղինակած փաթեթը, որով, նախ, վարչապետից այդ լիազորությունն անցնում է Կառավարությանը, բացի այդ՝ հնարավորություն է տրվել թեկնածուներ առաջադրել և՛ մեծամասնությանը, և՛ ընդդիմությանը:

– Անցած աշնանը իրավապահ մարմինները հայտարարում էին, որ կհրապարակեն նախկին նախագահ Ռոբերտ Քոչարյանի ունեցվածքի վերաբերյալ տվյալներ։ Միգուցե այդ ուղղությամբ քայլեր արվել են, բայց ինչո՞ւ մինչև հիմա տեղեկություններ չեն հրապարակվել։

– Դա իրավապահ մարմինների հրապարակելիքն է: Ես պատգամավոր եմ և պետական գաղտնիքներին ծանոթանալու իրավունք ունեմ: Բայց դա չի նշանակում, որ պետք է ամեն ինչ պատմեմ: Ես գիտեմ, որ գործընթացը նորմալ գնում է։

Հարցազրույցն ամբողջությամբ՝ տեսանյութում:

Արմինե Ավետյան