30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
«Թուրքիան մամուլի ազատության հարցում կրկին քննությունը չի հաղթահարել». Freedom House
Քաղաքականություն
06.06.2019 | 13:51
«Freedom House» միջազգային իրավապաշտպան կազմակերպությունը հրապարակել է մամուլի ազատության համաշխարհային զեկույցը, որից պարզ է դառնում, որ Թուրքիան կրկին «քննությունը չի հաղթահարել». փոխանցում է ermenihaber-ը:
Տարեկան այդ զեկույցում նշվում է, որ մամուլի ազատությունը վերջին 13 տարում զգալիորեն նահանջել է: Թուրքիան այս տարի ևս հայտնվել է այն երկրների ցանկում, որոնք մամուլի ազատության ինդեքսում որևէ առաջխաղացում չեն ունեցել:
Մամուլի ազատությունն ապահովելու հարցում համացանցի կարևորությունը ընդգծող զեկույցում Թուրքիան, Սերբիան և Զիմբաբվեն տեղ են գտել «մասամբ ազատ» երկրների ցանկում:
«Համացանցը կարևոր տեղ է զբաղեցնում այն երկրներում, որտեղ մամուլի ազատությունն անսպասելիորեն և սաստիկ կերպով սահմանափակվում է: 2016թ. ռազմական հեղաշրջման փորձից սկսած Թուրքիայում 150 լրատվամիջոց է փակվել: Հարյուրավոր լրագրողներ անհիմն կերպով մեղադրվել են ահաբեկչությանն աջակցելու մեջ: Այս ամենի հետևանքով լրագրողները տեղափոխվեցին դեպի համացանցային հարթակներ»,-ասվում է զեկույցում:
«Նահանջող ժողովրդավարություն» վերնագրով զեկույցը նկատել է տալիս, որ թուրքական իշխանություններին անհանգստացնում են համացանցային ԶԼՄ-ները:
Վերջին 5 տարում այնպիսի երկրներում, ինչպիսիք են Թուրքիան, Ռուսաստանը, Չինաստանը, Իրանը և Սաուդյան Արաբիան, լրագրողները և ԶԼՄ-ները ենթարկվում են բռնության: Օրինակ է բերվում Ստամբուլում գտնվող Սաուդյան Արաբիայի գլխավոր հյուպատոսության շենքում սաուդցի լրագրող Ջեմալ Խաշոկջիի սպանությունը:
Զեկույցում անդրադարձ է կատարվել նաև խոսքի ազատությանը: Այստեղ նշվել է, որ Թուրքիայում միայն 2017թ. «վարչապետին վիրավորելու» պատճառով ավելի քան 20.000 հետաքննություն է սկսվել, իսկ 6000 քաղաքացու նկատմամբ քրեական գործ է հարուցվել:
