15.08.2026 | 21:02
Վահան Կոստանյանը Զելենսկիին է փոխանցել ՀՀ բարձրագույն ղեկավարության շնորհավորանքները
«Պետք է հարցաքննվեն Մարտի 1-ին պաշտոնավարած բոլոր բարձրաստիճան իրավապահները»․ ԱԺ պատգամավոր. ՏԵՍԱՆՅՈՒԹ
Քաղաքականություն
05.06.2019 | 19:50
«Չմոռանանք անմեղության կանխավարկածի մասին»,- Մարտի 1-ի գործով սպանության կասկածանքով ձերբակալված Ոստիկանության զորքերի շտաբի նախկին պետ Գեղամ Պետրոսյանին առաջադրված մեղադրանքի մասին զգուշացնում է ԲՀԿ-ական պատգամավոր Իվետա Տոնոյանը։ Այն հարցին, թե 2008-ի մարտի 1-ին ԲՀԿ-ական այսօրվա պատգամավորները ի՞նչ էին մտածում սպանությունների մասին, տիկին Տոնոյանը նկատեց․ «Այդ օրերին բոլորի մոտ այնքան շոկային և էմոցիոնալ ֆոն է եղել, որ տեղի ունեցած իրադարձության գնահատականները քրեական հարթության մեջ են եղել և դրանից հետո նոր միայն որոշակի մանրամասներ են հրապարակվել, որոշակի անձանց մեղադրանքներ են առաջադրվել»։
Հիշեցնենք, որ ԲՀԿ-ն իշխանության մաս է եղել Ռոբերտ Քոչարյանի նախագահության օրոք, սակայն առաջարկում է սպասել, թե ինչպես կզարգանան իրադարձությունները հիմա։
«Մենք իսկապես հուսով ենք, որ իր ամբողջ ծավալով Մարտի 1-ի հանցագործությունները կբացահայտվեն և մեղավորները կկրեն իրենց պատիժը»,- ասում է ԱԺ ԲՀԿ խմբակցության անդամ Իվետա Տոնոյանը։
«Լուսավոր Հայաստանը» որևէ կերպ չի մեկնաբանի Ոստիկանության զորքերի շտաբի նախկին պետ Գեղամ Պետրոսյանին առաջադրված մեղադրանքը և ձերբակալությունը։ Հիշեցնենք, որ պարոն Պետրոսյանին առաջադրվել է Մարտի 1-ի զոհ Զաքար Հովհաննիսյանի սպանությունն իրականացնելու մեղադրանք։
«Այն անձինք, որոնք իրականում նման արարքներ կատարել են և առկա է բավարար ապացուցողական զանգված, որ նրանց մեղքն ինչ-որ առիթով ապացուցվում է, այդ անձինք բնականաբար պետք է ներգրավվեն գործում որպես մեղադրյալ հետագայում նաև ամբաստանյալ, եթե դատարանը որոշի, որ նրանք կատարել են նման հանցագործություն, ապա նրանք պետք է դատապարտվեն օրենքի տառին համապատասխան»,- հույս ունի ԱԺ ԼՀԿ խմբակցության անդամ Տարոն Սիմոնյանը։
Պարոն Սիմոնյանը համոզված է, որ այդ օրերին իրավապահ համակարգում աշխատած գրեթե բոլոր բարձրաստիճան պաշտոնատար անձինք պետք է ներգրավվեն գործում այս կամ այն կարգավիճակով․ «Նրանք, կարծում եմ, որ պետք է ունենան այնպիսի տեղեկատվություն, որն օգտակար կլինի գործի անաչառ և բազմակողմանի լուծմանը»։
Իշխանական պատգամավոր Անդրանիկ Քոչարյանը 2010-ին երկու անգամ փաստահավաք խմբի գործունեության շրջանակներում զրուցել է ոստիկանության զորքերի շտաբի նախկին պետի հետ, ինքը կասկածներ է ունեցել, որ Մարտի 1-ին գործել են զինված ապօրինի խմբավորումներ։
«Ասեմ ձեզ՝ երբ հաղորդագրությունը կարդացի, որ նախաքննական մարմինը արդեն Գեղամ Պետրոսյանին ոչ միայն կանչել է, այլև միջնորդել է կալանավորման, և դա կապվում է կոնկրետ սպանության հետ, դա խոսում է այն մասին, որ նախաքննական մարմինը, ինչքան էլ տարբեր լրատվամիջոցներ ասում էին, որ Մարտի 1-ի բացահայտումը կապված է միայն Ռոբերտ Քոչարյանին մեղադրանք ներկայացնելու հետ, և դա չի առնչվում սպանություններին, ես միշտ ասել եմ, որ ամեն ինչ հերթով գալու է, որովհետև սպանությունների մի զգալի մասն անհնար է չբացահայտել»,- վստահեցնում է ԱԺ «Իմ քայլը» խմբակցության անդամ Անդրանիկ Քոչարյանը։
Նա հիշեցնում է, որ նախորդ 10 տարում Մարտի 1-ը չի բացահայտվել միայն օրվա իշխանությունների իջեցրած քաղաքական պատվերի պատճառով։ Նրանք հրահանգել էին գործը կոծկել և այսօր կոծկողներից մեկը՝ այդ օրերի պաշտպանության նախարար Միքայել Հարությունյանը, փախել է Ռուսաստան։ Այն մարդիկ, որոնք Հայաստանում են, պարոն Քոչարյանը նրանց կուզեր տեսնել առնվազն հարցաքննվողների մեջ․ «Աղվան Հովսեփյանը, որը գլխավոր դատախազն էր այդ ժամանակ, ինքն էլ պետք է տա բացատրություններ, եթե չի տվել, թե ինչպես գլխավոր դատախազի պաշտոնը զբաղեցնելու պայմաններում հնարավոր է այդպիսի լայնածավալ կոծկումներ»։
Նախորդ իշխանությունները, ըստ Անդրանիկ Քոչարյանի, աշխատել են հրեշավոր մեթոդներով, որպեսզի հասարակությանը հայտնի չդառնան Մարտի 1-ին վերաբերող որևէ ճշմարտություն: Այսօր պարոն Քոչարյանը սպասում է, որ բացահայտումներ կլինեն նաև Մարտի 1-ի մյուս 9-ը սպանությունների մասով՝ նախաքննական մարմինը մեծ ծավալի աշխատանք է կատարում։
Մհեր Արշակյան
