02.09.2026 | 23:08
31 տեսախցիկ, 48 նոր ավտոմեքենա և ուսումնաարտադրական կենտրոններ․ Սրբուհի Գալյանը ներկայացրել է բարեփոխումները
Ռոբերտ Քոչարյանը, ազատության մեջ մնալով, կազդի Մարտի 1-ի գործով անցնողների վրա․ Արման Բաբաջանյան. ՏԵՍԱՆՅՈՒԹ
Քաղաքականություն
20.05.2019 | 21:05
Factor.am-ի հարցազրույցը ԱԺ «Լուսավոր Հայաստան» խմբակցության պատգամավոր Արման Բաբաջանյանի հետ
– Պարոն Բաբաջանյան, հայտնի դարձավ, որ Ռոբերտ Քոչարյանի, Արմեն Գևորգյանի, Սեյրան Օհանյանի և Յուրի Խաչատուրովի մասով Մարտի 1-ի գործի վարույթը դատարանի որոշմամբ կասեցվել է և ուղարկվել Սահմանադրական դատարան: Ի՞նչ է սա նշանակում:
– Համոզված եմ, որ վեթինգի վերաբերյալ վարչապետ Ն․Փաշինյանի հայտարարությունը լուրջ խմորումների և դիմադրության է արժանացել դատական համակարգում։ Դա կարելի է համարել հակահեղափոխականների պատասխանը, իսկ դրան միացել է դատական համակարգը։
– Դատական համակարգն այսօր գործող իշխանություններին դե՞մ է դուրս եկել։
– Ակնհայտ է, որ եթե մինչ այս պահը առնվազն մի քանի դատավոր հրաժարական չեն տվել հենց վեթինգի գործընթացի շրջանակներում, նշանակում է, որ դատական համակարգը սկսել է դիմադրել։
– Ռ․Քոչարյանը 11 տարի է, ինչ իշխանության չէ, շարունակում է ազդեցությո՞ւն ունենալ ՀՀ դատական համակարգի վրա։
– Կարծում եմ, ինքնին դատական համակարգի ակունքները սկիզբ են դրվել Ռ․Քոչարյանի պաշտոնավարման հետ համատեղ։ 1998-1999թթ․ տեղի ունեցավ դատաիրավական խոշոր բարեփոխում Դավիթ Հարությունյանի գլխավորությամբ, որը, ի վերջո, պարտական է հենց ճարտարապետ Ռ․Քոչարյանին։
– Ռ․Քոչարյանի խափանման միջոցը առաջին անգամ փոխվեց դեռևս անցած տարի աշնանը։ Ինչո՞ւ այն ժամանակ Ն․Փաշինյանը նման կոչով և դատական համակարգը վեթինգի ենթարկելու նախաձեռնությամբ հանդես չեկավ։
– Ես չափազանց մտահոգ եմ, երբ մենք այսպիսի ֆունդամենտալ հարցերին անդրադառնում ենք այն ժամանակ, երբ տեղի են ունենում հատվածական իրադարձություններ։ Վեթինգի մենք պետք է դիմեինք վաղուց, հեղափոխության սկզբնական շրջանում։ Եվ վեթինգի պետք է ենթարկվեին ոչ միայն դատական համակարգի ներկայացուցիչները, այլև ուժային բոլոր կառույցները՝ ԱԱԾ-ն, Ոստիկանությունը, ՊՆ-ն։ Եվ մենք պետք է հասկանականք, թե այդ մարդիկ ինչ կասկածելի կապեր ունեն, ինչ գիտելիքներ ունեն, ինչ հմտություններ և արդյոք նոր ՀՀ-ի հռչակած արժեքներին համապատասխան են։ Մենք գիտենք, որ Ոստիկանության շատ բարձրաստիճան պաշտոնյաներ սերտ կապեր ունեն քրեական աշխարհի և այլ երկրների հատուկ ծառայությունների հետ։ Այդպիսիք կան նաև ԱԱԾ-ում։ Ինձ համար զարմանալի էր, որ այսօրվա խորհրդակցությանը, որի ժամանակ Նիկոլ Փաշինյանը հանդես էր գալիս կարևոր ելույթով, այնտեղ ԱԱԾ-ից ներկա էր Արզուման Հարությունյանը, որն ինքը վեթինգի դեպքում դուրս կդրվեր պետական համակարգից։ Խորապես համոզված եմ, որ Ա․Հարությունյանն իր հարստությունը կարողացել է կուտակել նախորդ ռեժիմի պայմաններում՝ լինելով ՍԴ նախկին նախագահ Գագիկ Հարությունյանի եղբայրը և նախկին վարչապետ Կարեն Կարապետյանի խնամին։
– Վերադառնալով այսօր դատարանի կայացրած որոշմանը՝ կարո՞ղ ենք ասել, որ Ռ․Քոչարյանն արդեն ազատության մեջ կարող է ազդել գործով անցնողների վրա։
– Կարծում եմ, մենք իրավական գործընթացի ականատես չենք, սա արդեն քաղաքական գործընթացի մի մասն է։ Եվ Ռ․Քոչարյանն այլևս ազատության մեջ մնալով ազդում է Մարտի 1-ի գործով ընթացող զարգացումների վրա։ Եվ համոզված եմ, որ վկաները, դատավարության մասնակիցներն ավելի կաշկանդված են լինելու և կաշկանդված են լինելու օգնելու գործի բացահայտմանը։
Հարցազրույցն ամբողջությամբ՝ տեսանյութում:
Արմինե Ավետյան
