Հասարակություն
17.05.2019 | 14:55
ՀՀ երկրորդ նախագահ Ռոբերտ Քոչարյանի թիմն այսօր հրավիրված մամուլի ասուլիսի ժամանակ անդրադարձավ Քոչարյանի գործով նախնական դատական նիստի ընթացքին։
Պաշտպանները նշեցին, որ դատավարությունը թեև հարթ է անցել, սակայն որոշ խնդիրներ եղել են, քանի որ դատավարության վերջին օրը պաշտպանները ելույթ են ունեցել մեկ անգամով պակաս, ինչը խախտել է կողմերի միջև հավասարակշռությունը։
Անդրադառնալով Քոչարյանին առաջադրված մեղադրանքին՝ պաշտպան Արամ Օրբելյանը նշեց, որ եթե փողոց դուրս գան և հարցնեն, թե ինչի համար է դատվում Քոչարյանը, ապա այդ հարցին կտրվեն զանազան պատասխաններ:
Ըստ Օրբելյանի՝ խափանման միջոցի հիմնավոր կամ ոչ հիմնավոր լինելու հարցը քննող դատավորի համար շատ ավելի բարդ է որոշում կայացնել, քանի որ հարցի քննությունն ընթացել է դռնբաց նիստի պայմաններում, եղել է հրապարակային և թափանցիկ։
Անդրադառնալով դատարանում դատախազական կողմից հնչած մեղադրանքներին՝ Օրբելյանն ասաց, որ Ազատության հրապարակում 2008թ. մարտի 1-ի վաղ առավոտյան ոստիկանական օպերացիայի մասին Քոչարյանը չի իմացել։
«Այն, որ այդտեղ պետք է տեղի ունենա բախում, պարոն Քոչարյանը չի իմացել: Եվ որպես փաստարկ բերել է ԵՊՀ ուսանողների հետ հանդիպումից մի կտոր, մի հատված և ասել, որ այդ հանդիպմանն ասել են՝ կարող է բախում լինի: Իհարկե, կարող է բախում լինի ոստիկանների հետ, դա ոչ մեկ չէր կարող բացառել»,- ասաց Օրբելյանը։
Ինչ վերաբերում է դատախազական կողմի ելույթներին՝ պաշտպանը նշեց, որ իրենք կողմ են, որ գլխավոր դատախազը ներկա լինի և անձամբ ներկայացնի մեղադրանքը, սակայն, ըստ նրա, անօգուտ է, երբ դատախազը ներկայանում է մեկ առաջին, մեկ վերջին նիստին։
«Ընդ որում, վերջին նիստին ներկայանում է այն ժամանակ, երբ քննարկվում է Արցախի երկու նախագահների երաշխավորության հարցը»,–ասաց Օրբելյանը։
Ասուլիսին ներկա պաշտպանական թիմի մեկ այլ անդամի՝ Հովհաննես Խուդոյանի խոսքով էլ Արթուր Դավթյանի՝ դատարանին ուղղված կոչերում սպառնալիք կար:
«Դատարանին ասել, որ ամբողջ պարտականությունն ընկել է ձեզ վրա և դուք եք պատասխանատու այս գործի համար, իրավական չէ և դատարանին լրացուցիչ լարվածության մեջ է դնում՝ առանց այն էլ ստեղծված լարված մթնոլորտում»,- նշեց նա:
Անդրադառնալով գլխավոր դատախազի՝ երեկ արած այն հայտարարությանը, թե 120 մլն դրամ ոչ բյուջետային միջոցներից հատկացվել է զինծառայողներին վարձատրելու համար, Խուդոյանն ասաց, որ այդ գումարները նախապես չեն բաժանվել ինչ-որ բանի դիմաց:
«Դրանք բաժանվել են հետագայում, արտակարգ դրության ժամանակ ծառայություն իրականացրած զինվորներին: Դա ներկայացվում է որպես շատ բացասական երևույթ: Արդյոք մասնավոր միջոցներից զինծառայողներին վարձատրություն տալը կարող է համարվել հանցագործություն: Եթե ոչ, կխնդրենք չշահարկել այդ հանգամանքը», – ասաց նա։
Դատախազի այդ հայտարարության վերաբերյալ Արամ Օրբելյանն էլ հավելեց․ «Սասուն Խաչատրյանը, երբ ասուլիսում այդ մասին հայտարարեց, ցույց էր տալիս Պաշտպանության նախարարության տեղեկագիր: Եթե ուզում ես մի բան թաքցնել, պաշտոնական փաստաթուղթ չես կազմում ու պաշտոնական փաստաթուղթ չես արխիվացնում: Իսկ մենք հետո կքննարկենք ու կհասկանանք՝ ինչ կապ ունեն այդ գումարները պարոն Քոչարյանի հետ»:
