Ոստիկանությունը «Սաշիկի արագաչափերի» ընկերության հետ 3 միլիարդ 172 միլիոն դրամի նոր պայմանագիր է կնքել

Հայաստանի հետհեղափոխական կառավարությունն աղմուկի կենտրոնում հայտնված «Սեքյուրիթի Դրիմ» ՍՊԸ-ի հետ 3 միլիարդ 172 միլիոն դրամի նոր պայմանագիր է կնքել:

Պայմանագրի շրջանակներում ընկերությունը շարունակելու է իրականացնել ճանապարհային երթևեկության կանոնների պահպանում՝ արագաչափ սարքերի և տեսախցիկների միջոցով: Պայմանագիրը Ոստիկանության ու «Սեքյուրիթի Դրիմ» ՍՊԸ-ն կնքել են 2019 թվականի հունվարի 25-ին: Այս մասին Factor.am-ը տեղեկանում է ՀՀ կառավարության e-gov.am կայքից:

Պայմանագրից տեղեկանում ենք, որ նշյալ 3 միլիարդ 172 միլիոն դրամից 314 միլիոն 200 հազար դրամը «Սեքյուրիթի Դրիմ» ՍՊԸ-ի կատարած աշխատանքի վարձատրության արժեքն է, իսկ 2 միլիարդ 850 միլիոնն ընկերության կատարած ծախսերի փոխհատուցումը:

Ուշագրավ է այն հանգամանքը, որ այս չափի խոշոր գնումը իրականացվել է առանց մրցույթի, մեկ անձից կատարվող գնումների ընթացակարգով: 3 միլիարդ 172 միլիոն դրամի կնքված պայմանագրի համատեքստում աչքի է ընկնում նաև այն փաստը, որ նախորդ տարի՝ 2018 թվականին, Ոստիկանության կազմակերպված հանցավորության դեմ պայքարի վարչության կոռուպցիայի և տնտեսական գործունեության դեմ ուղղված հանցագործությունների հակազդման վարչությունը բացահայտել էր, որ «Սեքյուրիթի Դրիմ» ընկերությունը պետությանը պատճառել է 1 միլիարդ 15 միլիոն 869 հազար 600 հարյուր դրամի վնաս:

«Սեքյուրիթի Դրիմ» ընկերությունը միշտ կապվել է Հայաստանի երրորդ նախագահ Սերժ Սարգսյանի եղբոր՝ Սաշիկ Սարգսյանի հետ:

Ի դեպ, այդ մասին պնդումներ ինչպես հեղափոխությունից առաջ, այնպես էլ հեղափոխությունից հետո, արել է նաև ՀՀ վարչապետ Նիկոլ Փաշինյանը: Մասնավորապես, ապրիլի վերջին ուղիղ եթերում պատասխանելով ֆեյսբուքյան օգտատերերի հարցերին, Նիկոլ Փաշինյանն ասել էր. «…ներվել է Սաշիկի արագաչափերի տուգանքի 13 միլիարդ դրամը»:

Իսկ ահա Ճանապարհային ոստիկանության պետի նախկին տեղակալ, ԱԺ «Իմ քայլը» խմբակցության պատգամավոր Արմեն Խաչատրյանը վարչապետի հայտարարությունից հետո Factor.am-ի հետ զրույցում ասել էր, որ արագաչափերը պետական են, որևէ մեկին չեն պատկանում:

Ավելի վաղ էլ Խաչատրյանն այլ լրատվամիջոցի հետ զրույցում նշել էր, որ Սաշիկ Սարգսյանն արագաչափերի բիզնես չի ունեցել: Հիշարժան է նաև այն, որ 2018 թվականի ապրիլին, երբ ընթանում էր «Իմ քայլը» արշավը, իրականացվում էին ակցիաներ, որոնց շրջանակներում Նիկոլ Փաշինյանը և մյուսները կպչուն թղթերով փակում էին արագաչափերի տեսախցիկները:

Նարեկ Կիրակոսյան