Հայկական վարորդական վկայականների հարցով ռուսական կողմի հետ համաձայնություն է ձեռք բերվել. Ա. Արարատյան

ՌԴ-ում հայկական վարորդական վկայականների հարցով ռուսական կողմի հետ համաձայնություն է ձեռք բերվել: Այս մասին Factor.am-ին տեղեկացրեց վարչապետ Կարեն Կարապետյանի մամուլի խոսնակ Արամ Արարատյանը:

Նշենք, որ օրեր առաջ Աստանայում Եվրասիական միջկառավարական խորհրդի նիստում խորհրդի անդամները, ի թիվս այլ հարցերի, անդրադարձել էին նաև ազգային և միջազգային վարորդական իրավունքների փոխադարձ ճանաչմանն առնչվող խնդիրներին: Այդ ժամանակ Արամ Արարատյանը Factor.am-ի հետ զրույցում պարզաբանել էր, որ  հարցը վերջնական լուծում չի ստացել և շարունակում է մնալ օրակարգում: 

«Օգոստոսի 18-ին Մոսկվայում կազմակերպված խորհրդակցությանը մասնակցել են ՀՀ ոստիկանության պետի տեղակալ Վարդան Եղիազարյանը և ՌԴ ներքին գործերի նախարարի առաջին տեղակալ Ալեքսանդր Գորովոյը: Կողմերը համաձայնել են, որ սեղմ ժամկետներում անհրաժեշտ է համապատասխան փոփոխություններ կատարել ՌԴ և ՀՀ օրենսդրություններում, որոնք վերաբերում են խնդրո առարկային»,- մեզ հետ զրույցում ասաց նա:

Հիշեցնենք, որ Ռուսաստանում վերջերս կատարված օրենսդրական փոփոխությամբ արգելվեց աշխատանքի ընդունել օտարերկրացի այն վարորդներին, որոնք ՌԴ վարորդական իրավունք չունեն: Օրենքով նախատեսված արգելքը, սակայն, չի վերաբերվում այն երկրների քաղաքացիներին, որտեղ ռուսերենը պաշտոնական լեզու է, խոսքն այս դեպքում Ղրղըզստանի և Բելառուսի մասին է:

Օրենսդրական այս փոփոխությունը դժգոհությունների պատճառ դարձավ Հայաստանից Ռուսաստան արտագնա աշխատանքի մեկնողների և առհասարակ, ձեռնարկատիրական գործունեությամբ  զբաղվող ՀՀ քաղաքացիների համար: Խնդրին փորձեց լուծում տալ Ազգային ժողովի նախագահ Արա Բաբլոյանը Ռուսաստանի Պետդումայի խոսնակ Վյաչեսլավ Վոլոդինի հետ հանդիպման ընթացքում, սակայն ապարդյուն: Ի պատասխան՝ ռուսաստանցի պաշտոնյան Բաբլոյանին առաջարկել էր ռուսերենին տալ պաշտոնական կարգավիճակ: Հավելենք, որ փորձագետների պնդմամբ՝  հունիսի 1-ից ՌԴ-ում գործող օտարերկրյա, այդ թվում՝ Հայաստանի վարորդական իրավունքներով ձեռնարկատիրական և աշխատանքային գործունեության իրականացման արգելքը հակասում է ԵԱՏՄ աշխատուժի ազատ տեղաշարժի սկզբունքին: 

Շողիկ Գալստյան