ԱՄՆ-ն դեմարշ է հայտարարել Կիևին Նովոռոսիյսկի նավթային տերմինալին հարվածից հետո

ԱՄՆ-ում Ուկրաինայի դեսպան Օլգա Ստեֆանիշինան Պետդեպարտամենտից դեմարշ՝ պաշտոնական դիվանագիտական ​​ծանուցում է ստացել՝ Ուկրաինայի զինված ուժերի կողմից Նովոռոսիյսկի նավթային տերմինալի վրա հարձակումից հետո, որը տեղի է ունեցել դեռևս 2025 թվականի նոյեմբերին: Այս մասին հաղորդում է «Суспiльне»-՝ հղում անելով Ստեֆանիշինային։

Ըստ Ուկրաինայի դեսպանի՝ ԱՄՆ արձագանքը պայմանավորված էր նրանով, որ հարվածները անմիջականորեն ազդել են ամերիկյան շահերի վրա, գրում է The Insider-ը։

«Մեզ հայտարարեցին, որ Նովոռոսիյսկի վրա ուկրաինական հարձակումներն ազդել են Ղազախստանի միջոցով իրականացվող որոշ ամերիկյան ներդրումների վրա։ Եվ մենք Պետդեպարտամենտից լսեցինք, որ մենք պետք է զերծ մնանք ամերիկյան շահերի վրա հարձակումներից», – նրա խոսքերը մեջբերում է CNN-ը։
ԱՄՆ-ն չի առաջարկել, որ Ուկրաինան լիովին զերծ մնա Ռուսաստանում կարևորագույն և ռազմական ենթակառուցվածքների վրա հարձակումներից։

Անցյալ տարվա նոյեմբերին ուկրաինական ուժերը առնվազն երեք անգամ հարձակվել են Նովոռոսիյսկ նավահանգստի նավթային տերմինալի վրա: Նոյեմբերի 14-ի գիշերը տեղի ունեցած հարձակումից հետո իշխանությունները քաղաքում արտակարգ դրություն էին հայտարարել, իսկ «Տրանսնեֆտը» դադարեցրել էր նավթի մղումը նավահանգիստ:

Ուկրաինայի զինված ուժերի գլխավոր շտաբը նոյեմբերի 25-ին հաղորդել էր ևս մեկ հաջող հարվածի մասին՝ նշելով, որ վնասվել են նավթի  սարքավորումները: Նոյեմբերի 29-ին ծովային անօդաչու թռչող սարքերը կրկին հարձակվել էին նավահանգստի վրա՝ ոչնչացնելով նավամատույցներից մեկը:

Թարգմանությունը՝ Էմմա Չոբանյանի