Քաղաքականություն
29.04.2019 | 20:33Արդարադատության նախկին նախարար Հովհաննես Մանուկյանը համամիտ է ներկա նախարար Արտակ Զեյնալյանի հետ, որ ԴԱՀԿ նախկին պետ Միհրան Պողոսյանին քաղաքական ապաստան տալու-չտալու հարցը Ռուսաստանի սուվերեն իրավունքն է:
«Տեսականորեն, այո՛, հնարավոր է ապաստան խնդրել, բայց քիչ թե շատ իրեն հարգող երկիր, որը գնահատում է իր սուվերենությունը, մերժելու է այդ դիմումները»,- ասաց Հովհաննես Մանուկյանը՝ հավելելով, որ միջազգային նման պրակտիկա չկա, որ որևէ երկրում քրեորեն հետապնդվող անձին քաղաքական ապաստան տրվի: «Քաղաքական ապաստան տրվում է քաղհալածյալներին»,- շեշտեց Մանուկյանը:
Դիտարկմանը, թե Ռուսաստանը դե ֆակտո ապաստան է տվել պաշտպանության նախկին նախարար Միքայել Հարությունյանին, Մարտի 1-ի գործով քննչական խմբի ղեկավար Վահագն Հարությունյանին՝ Հովհաննես Մանուկյանը պատասխանեց, որ իրեն հայտնի չէ՝ ինչ փաստարկներով չեն արտահանձնվում այդ անձինք՝ հորդորելով դիմել պատկան մարմիններին:
Նա նաև չի կարծում, որ Միհրան Պողոսյանի միլիոնները կարող են դեր խաղալ ՌԴ-ից ապաստան ստանալու հարցում:
Իր արդարադատության նախարար աշխատած շրջանում՝ 2014-2015 թթ., տեղեկություններ էին շրջանառվում, որ համակարգում վճռորոշ դերակատարը հենց ԴԱՀԿ ծառայության ղեկավար Միհրան Պողոսյանն էր, և նախարարն անգամ շատ քայլեր ստիպված էր նրա հետ համաձայնեցնել, քանի որ Պողոսյանը Սերժ Սարգսյանի մտերիմն էր:
«Անկեղծ ասած՝ նման հարցադրումը կարող էր ծիծաղ առաջացնել ինձ մոտ, եթե իրականում դա շատ տխուր իրավիճակ չլիներ: Որովհետև եթե հանրության մեջ կա կարծիք, որ նախարարության ծառայության ղեկավարը կարող է նախարարության գլոբալ խնդիրների հետ կապված որոշումներ կայացնել, դա մեր հասարակության ողբերգությունն է իրականում»,- ի պատասխան՝ ասաց Հովհաննես Մանուկյանը՝ շարունակելով. «Այո՛, տեղեկություններ շրջանառվում էին, և այդ տեղեկությունները կապված էին նրա հետ, որ որոշ հարցերում և որոշ անձանց նկատմամբ անպատժելիության մթնոլորտ կար»: Նա, միաժամանակ, հերքեց, թե Պողոսյանը կարող էր միջամտել նախարարության գործունեությանը:
Հիշեցմանը, թե այն ժամանակ ասել է, որ Միհրան Պողոսյանը լավ աշխատող է, իսկ այսօր խոսում է անպատժելիության մթնոլորտից, Մանուկյանն ասաց. «Ես տարիների, նույնիսկ տասնամյակների տարբերությամբ իմ հայտարարությունները չեմ խմբագրում, և կրկին անգամ կարող եմ ասել, որ ԴԱՀԿ ծառայությունում Միհրան Պողոսյանը բավական արդյունավետ և կազմակերպված աշխատանք էր տանում»:
Արդարադատության նախկին նախարարը նաև հաստատեց, որ նախկինում Հայաստանում կոռուպցիա է եղել: «Այո՛, բավական լայնածավալ կոռուպցիա է եղել մեր երկրում, որոշ ոլորտներում նաև համակարգված կոռուպցիա է եղել»,- ասաց արդարադատության նախկին նախարարը՝ միաժամանակ նշելով, որ իրեն կոռուպցիոն ցուցումներ չեն եղել: «Ես ցուցումներ չեմ ընդունել՝ որպես դատավոր և որպես դատարանի նախագահ աշխատած տարիներին: Ընդհանրապես որևէ ցուցում չեմ ընդունել, և հավատացեք, այո՛, ես անկախ եմ գործել»:
Հովհաննես Մանուկյանի կարծիքով՝ Հայաստանի նոր իշխանությունը բաց է թողել անցումային արդարադատության կիրառման պահը: «Անցումային արդարադատության օրակարգը կարելի է համարել փակված, որևէ լուրջ պրոցես այստեղ տեղի չի ունենա»,- նշեց Մանուկյանը:
Հարցազրույցն ամբողջությամբ՝ տեսանյությում:
Մարինե Խառատյան
