Վ. Բրյուսովի անվան համալսարանում յուրացումների գործով մեղադրանք է առաջադրվել

Երևանի Վ. Բրյուսովի անվան պետական լեզվահասարակագիտական համալսարանում պարենային ու նյութական միջոցների շուրջ 36 մլն դրամի արժողության պակասորդի փաստի առթիվ քրեական գործ է հարուցվել:

«Փաստինֆո»-ի հարցմանն ի պատասխան ՀՀ քննչական կոմիտեից հայտնեցին, որ համալսարանի կենտրոնական պահեստի պահեստապետին մեղադրանք է առաջադրվել ՀՀ քրեական օրենսգրքի 179-րդ հոդվածի 3-րդ մասի 1-ին կետով՝ առանձնապես խոշոր չափերի յուրացնելը կամ վատնելը:

Համալսարանի կենտրոնական պահեստում, տպարանում և Ծաղկաձորի հանգստյան տանը հայտնաբերված պակասորդի և հասցված վնասի չափը պարզելու նպատակով նշանակվել են դատատնտեսագիտական և դատահաշվապահական համալիր, ինչպես նաև դատահամակարգչատեխնիկական փորձաքննություններ:

Հիշեցնենք, որ համալսարանում ենթադրաբար յուրացման և վատնելու ևս մեկ գործ էլ հարուցվել է օրերս հարուցվել՝ գույքագրման արդյունքում արձանագրվել է համալսարանի աշխատակիցներին հանձնված գույքի ընդհանուր 30.209.096,9 ՀՀ դրամի չափով պակասորդ:

Մասնավորապես, պարզվել է, որ 2009-2015 թվականներին համալսարանի իրավասու պաշտոնատար անձինք գույքագրումներն անցկացրել, ինչպես նաև պակասորդ ապրանքների հաշվապահական ձևակերպումներն իրականացրել են ոլորտը կարգավորող իրավական ակտերի խախտումներով, ինչը հանգեցրել է նրան, որ պակասորդ գույքը տարիներ շարունակ չի հայտնաբերվել:

Այս փաստով էլ քրեական գործ է հարուցվել ՀՀ քրեական օրենսգրքի 179-րդ հոդվածի 3-րդ մասի 1-ին կետով և 315-րդ հոդվածի՝ պաշտոնեական անփութությունը, 1-ին մասով նախատեսված հանցագործությունների հատկանիշներով: