14.11.2024 | 23:29
ՀՀ էկոնոմիկայի փոխնախարարի գլխավորած պատվիրակությունն այցելել է Չաբահար նավահանգիստ
Գերմանիայի ԱԳ նախարարը Էրդողանին առաջարկել է ինքնակամ դադարեցնել ԵՄ-ին անդամակցելու բանակցությունները
Քաղաքականություն
25.08.2017 | 10:37
Գերմանիայի արտաքին քաղաքական գերատեսչության ղեկավար Զիգմար Գաբրիելը Թուրքիայի նախագահ Ռեջեփ Թայիփ Էրդողանին առաջարկել է հանդես գալ ԵՄ անդամակցության շուրջ բանակցությունները դադարեցնելու նախաձեռնությամբ, քանի որ ստեղծված իրավիճակում քիչ հավանական է, որ դրանք դրական արդյունքի կհանգեցնեն. փոխանցում է tass.ru-ն:
«Թուրքիան, որը սահմանափակում է խոսքի ազատությունը, բանտ է նետում անմեղ մարդկանց և ճնշում է ընդդիմությանը, չի կարող Եվրամիության մաս դառնալ,- ասել է նա Bild-ին տված հարցազրույցում:- Դա գիտի նաև Թուրքիայի նախագահը: Կարծում եմ՝ նա ինքն էլ դա չի ուզում և լուրջ չի ընդունում անդամակցության բանակցությունները»:
Միաժամանակ Գերմանիայի ԱԳ ղեկավարը նշել է, որ ԵՄ-ն ինքը չի դադարեցնի բանակցությունները: «Թող ինքը (Թուրքիայի նախագահը-խմբ) դա անի: Ես չեմ ուզում նրան աջակցել հերթական սադրանքի հարցում»,- պարզաբանել է Գաբրիելը:
Նրա խոսքով՝ Թուրքիան մեծ է և գոյություն կունենա նաև Էրդողանից հետո: «Մենք խնդիր չունենք Թուրքիայի հետ, թուրքերի հետ, մենք խնդիր ունենք ներկայիս կառավարության և նախագահի վարվող քաղաքականության հետ», – հայտարարել է նախարարը՝ նշելով, որ դա հստակ տարանջատել է պետք:
