Հասարակություն
28.03.2019 | 12:59ՀՀ Մարդու իրավունքների պատշպանի աշխատակազմը դիտարկում է իրականացրել հանրապետության 201 դպրոցներում և մանկապարտեզներում:
Կրթօջախներում ջրի և սանիտարահիգիենիկ պայմանների ուսումնասիրությանը վերաբերող ծրագիրը ՄԻՊ-ը սկսել է 2017 թվականից: Արդյունքներն այսօր՝ մարտի 28-ին լրագրողների հետ հանդիպմանը ներկայացրեց պաշտպան Արման Թաթոյանը:
«Մոնիթորինգն իրականացվել է 121 դպրոցում և 80 մանկապարտեզում: Դրանք ընտրվել են պատահականության սկզբունքով»,- ասաց Թաթոյանը:
Մարդու իրավունքների պաշտպանի խոսքով՝ սանիտարահիգիենիկ վիճակը մտահոգիչ է և անընդունելի: «Արձանագրվել են բազմաթիվ դեպքեր, երբ շենքի ներսում սանհանգույցներ չկան, դրանք տեղակայված են դրսում: Եղել են անթույլատրելի դեպքեր, երբ սանհանգույցներում զուգարանակոնքերը տեղադրված չեն եղել փակ խցիկներում, առանձնացված չեն եղել միջնորմներով, այսինքն՝ երեխաները՝ աղջիկ և տղա, ստիպված են եղել այս պայմաններում օգտվել: Շատ տեղերում դրանք նաև ասիական տիպի են՝ առանց զուգարանակոնքերի»,- թվարկեց Արման Թաթոյանը:
Բացի այդ՝ ուսումնասիրված դպրոցների 80 տոկոսում տաք ջուր չկա, իսկ մանկապարտեզների 40 տոկոսն է ապահովված տաք ջրամատակարարմամբ:
«Մեզ հետ աշխատել է նաև բժշկական անձնակազմ, որն արձանագրել է, որ բազմաթիվ են դեպքերը ռիսկային է վիճակը երեխաներին վարակիչ հիվանդություններով վարակելու տեսանկյունից: 121 դպրոցից միայն 8-ում և 80 մանկապարտեզից միայն 2-ում են սանհանգույցները հարմարեցված հաշմանդամություն ունեցող երեխաներին»,- նշեց պաշտպանը:
Նա հավելեց, որ ուսումնասիրության արդյունքների շուրջ քննարկում է եղել կրթության և գիտության նախարարի հետ: «Պայմանավորվածություն ունենք, որ այս զեկույցում տեղ գտած խնդիրները պարտադիր հիմք են ընդունելու և քայլեր են ձեռնարկվելու՝ դրանք լուծելու համար: Որովհետև այն, ինչ մենք արձանագրել ենք, մեր երեխաների լավագույն շահի և իրավունքների ապահովման տեսակետից անընդունելի է պարզապես»,- հավելեց Արման Թաթոյանը:
Մանրամասները՝ տեսանյութում:
