09.10.2026 | 23:47
Վրաստանում սպանության համար հետախուզվող է հայտնաբերվել. ՀՀ և Վրաստանի ՆԳՆ-ների համագործակցության արդյունքը
Հայաստանում կանանց հեղափոխություն իրականացնելու բոլոր նախադրյալները կան․ կոնֆերանս՝ «Կանայք, նորագույն տեխնոլոգիաներն ու ձեռներեցությունը» թեմայով. ՏԵՍԱՆՅՈՒԹ
Հասարակություն
07.03.2019 | 20:46
Կանայք, նորագույն տեխնոլոգիաներն ու ձեռներեցությունը․ կանանց միջազգային օրվան ընդառաջ Ֆրանսիայի դեսպանությունն ու ՀԲԸՄ-ն՝ Հայաստանում ֆրանսիական համալսարանի հետ համագործակցությամբ կոնֆերանս-քննարկում են կազմակերպել։ Այն հասցեագրված է մայրաքաղաքի ավագ դպրոցի աշակերտներին և նպատակ ունի խրախուսել ձեռներեցության ու նոր տեխնոլոգիաների ոլորտում կանանց մասնակցությունը: Այստեղ նկատելի հաջողություններ գրանցած կանայք սեփական փորձով են կիսվում։
«Վիկիմեդիա Հայաստան»-ի գործադիր տնօրեն Գայանե Վարդանյանն ընդգծում է․ աշխատանքի ընթացքում երբեք խտրականության չի բախվել։
«Վիկիմեդիա Հայաստանում կանայք բավական լուրջ կշիռ ունեն: Կանանց ձայնը մեր կազմակերպությունում լիովին լսելի է: Մեկուկես տարի է, ինչ աշխատում եմ և որևէ պարագայում չեմ զգացել խտրականություն կամ կանանց դերի նվազեցման որևէ միտում։ Բացի այդ, հայաստանյան վիքիհամայնքն առանձնահատուկ է նրանով, որ շատ երկրներում կանանց մասնակցության խնդիր կա, իսկ մեր դեպքում ունենք հակառակ պատկերը․ կին խմբագիրները հայկական համայնքում ավելի շատ են»,- նշում է Գայանե Վարդանյանը։
Հայաստանում Ֆրանսիայի արտակարգ և լիազոր դեսպան Ժոնաթան Լաքոթի կարծիքով՝ ձեռներեցությունն ու նոր տեխնոլոգիաներն այսօր Հայաստանի տնտեսական զարգացման կարևոր հիմնասյուներից են: Իսկ հայ կանայք ունեն այդ ոլորտներում հաջողության հասնելու և նոր՝ կանանց հեղափոխություն իրականացնելու բոլոր նախադրյալները։
«Հայաստանը և հայկական տնտեսությունը մեծ փոփոխությունների են ենթարկվել և կարևոր է, որ այդ փոփոխությունների ընթացքում հայ կինը կարողանա իր ճիշտ տեղը գտնել։ Նորագույն տեխնոլոգիաները Հայաստանի համար կարևոր ռեսուրս են և կարևոր է, որ դրանց զարգացման գործում կանայք իրենց ներդրումն ունենան»,- ընդգծում է Ժոնաթան Լաքոթը։
Նրա խոսքով՝ Հայաստանում ֆրանսիական համալսարանում նոր ֆակուլտետ են բացել՝ հույսով, որ կոգեշնչեն աղջիկներին նոր մասնագիտություն ստանալ։
«ՀՖՀՀ-ում հինգերորդ ֆակուլտետ է բացվել՝ ինֆորմատիկայի և կիրառական մաթեմատիկայի։ Մեզ համար կարևոր է, որ այդ ֆակուլտետներում ուսանելու հետաքրքրություն ցուցաբերեն հատկապես աղջիկները»,- նշում է Ժոնաթան Լաքոթը։
«ԹՈՒՄՈ» ստեղծարար տեսնոլոգիաների կենտրոնի ղեկավար Մարի Լու Փափազյանն արդեն 13 տարի է Հայաստանում է աշխատում։ Ասում է՝ կին-տղամարդ անհավասարության հարցում տարիների ընթացքում որոշակի փոփոխություններ է նկատել։
«Փոփոխությունները հստակ են։ Դեպի առաջ ենք գնում․ կինն այսօր կարողանում է ուսանել, ճամփորդել, մասնագիտանալ և նույնիսկ հետաքրքիր ու կարևոր դիրքեր զբաղեցնել։ Կարծում եմ՝ եթե այս տեմպերով շարունակենք, շատ արագ կհասնենք մի վիճակի, երբ այդ տարբերությունը միայն մեր հիշողության մեջ կլինի»,- հույս է հայտնում Մարի Լու Փափազյանը։
Կոնֆերանս-քննարկման ընթացքում ներկայացվեց նաև «Կանայք և ձեռներեցությունը» թեմայով դասախոսություն։
Կազմակերպիչները լիահույս են, որ կարերայի և սեռային հավասարության մասին պատմությունները կոգեշնչեն երիտասարդ աղջիկներին ու առավել մեծ ձգտում կստեղծեն բարձրագույն կրթություն ստանալու և իրենց մասնագիտական ապագան կառուցելու հարցում։
Նելլի Մելքոնյան
