Կամավորներին կթույլատրե՞ն մասնակցել հրդեհաշիջման աշխատանքներին. ԱԻՆ-ից պարզաբանում են

«Խոսրովի անտառ» արգելոցի տարածքում օպերատիվ գործող շտաբ կա, որն էլ տեղում որոշում կկայացնի և անհրաժեշտության դեպքում կաշխատի այնտեղ մեկնած կամավորների հետ: Այս մասին Factor.am-ի հետ զրույցում հայտնեց ՀՀ ԱԻՆ մամուլի խոսնակ Նանա Գնդոյանը:

Factor.am-ն ավելի վաղ հայտնել էր, որ Հայկական բնապահպանական ճակատի մի խումբ կամավորներ այսօր վաղ առավոտյան մեկնել են «Խոսրովի անտառ» արգելոց՝ հրդեհաշիջման աշխատանքներին բմասնակցելու նպատակով: «Օպերատիվ գործող շտաբը, կարծում եմ, իրենց հետ կաշխատի, բնականաբար, եթե ռեսուրս կա, այն կօգտագործվի, պարզապես պետք է այն ճիշտ օգտագործել: Բնապահպանը հրդեհաշիջող չի, հրդեհաշիջումը կյանքի համար որոշակի վտանգներ պարունակող գործողություն է, և դա պետք է հասկանալ»,- ասաց խոսնակը:

ԱԻՆ-ի խոսնակը նաև տեղեկացրեց, որ հրդեհաշիջման աշխատանքներն իրականացվում են Արտակարգ իրավիճակների նախարարության ուժերով: «Ունենք նաև Պաշտպանության նախարարության կողմից տրամադրված ուղղաթիռ, որն արդեն երկու հրդեհաշիջող թռիչք է իրականացրել»,- շարունակեց Նանա Գնդոյանը՝ հավելելով, որ ժամանակ առ ժամանակ հրդեհաշիջման աշխատանքներին մասնակցում են նաև ՀՀ ոստիկանության աշխատակիցները:

Հավելենք՝ ԱԻ նախարար Դավիթ Տոնոյանը դիմել է ՌԴ ԱԻ նախարար Վլադիմիր Պուչկովին՝ տրամադրելու հրդեհաշիջման աշխատանքներ իրականացնող ինքնաթիռ՝ «Խոսրովի անտառ» պետական արգելոցում բռնկված հրդեհի մարման աշխատանքներին աջակցելու համար: Ներկայումս նախապատրաստական աշխատանքներ են տարվում ինքնաթիռը Հայաստան բերելու ուղղությամբ:

Շողիկ Գալստյան