Շարմազանովը՝ արտաքին մարտահրավերների և արցախյան հիմնախնդրի մասին. ՏԵՍԱՆՅՈՒԹ

ՀՀԿ խոսնակ Էդուարդ Շարմազանովը հունվարի 29-ին հրավիրված ասուլիսում անդրադարձավ արտաքին մարտահրավերներին և Արցախյան հիմնախնդրին:

«Հայաստանը դարձել է իզգոյ, կորցրել է ՀԱՊԿ գլխավոր քարտուղարի պաշտոնը։ Հայ-ռուսական հարաբերությունների վերաբերյալ. վարչապետն խոսում է, որ երբեք այսքան փայլուն չեն եղել այդ հարաբերությունները, ես էլ մտածում եմ, որ գազը ոչ թե պետք է թանկանա, այլ իջնի, ներդումներն էլ ՌԴ-ից ավելանան։ Ի՞նչ եղավ. հունվարի 1-ից սահմանին գազը թանկացավ: ԵՏՄ-ի հետ կապված՝ ես իրեն հարց եմ տալիս. եթե ԵՏՄ մտնելը սխալ էր, ինչո՞ւ է այդ սխալը կրկնում, եթե սխալ է՝ ինչո՞ւ ես Դավոսում քո ելույթում պարծենում ԵՏՄ-ի ընձեռած հնարավորություններով»,-հարցադրումներ հնչեցրեց Էդուարդ Շարմազանովը:

Ինչ վերաբերում է արցախյան հակամարտության կարգավորմանը, ՀՀԿ խոսնակը նկատեց, որ ապրիլյան պատերազմից հետո Հայաստանի դիրքերը բանակցային գործընթացում կոշտացել էին, որի արդյունքում հասել էինք Սանկտ Պետերբուրգի և Վիեննայի պայմանավորվածություններին, որոնց այժմ հղում չի արվում:

«Զոհրաբ Մնացականյանն ասում է, որ Սանկտ Պետերբուրգը և Վիեննան կան, դրանց ավելացել է Դուշանբեն: Էդ Դուշանբեում ի՞նչ է եղել: Դուշանբեից հետո Ադրբեջանի նախագահն ու արտաքին գործերի նախարարը հայտարարում են, որ Արցախը չի կարող ունենալ ավելի բարձր կարգավիճակ, քան ինքնավարություն Ադրբեջանի կազմում, դրանից հետո հայտարարում են, որ 2019 թվականը բեկումնային է լինելու, խոսում են խաղաղության մասին: Մերոնք ի՞նչ են ասում: Ոչի՛նչ»,- ասաց Էդուարդ Շարմազանովը՝ շեշտելով, որ իրենք խաղաղությանը դեմ չեն, բայց դեմ են խաղաղություն մուրալուն:

«Երբ Զոհրաբ Մնացականյանն ասում է, որ խաղաղության այլընտրանքը կատաստրոֆան է, ես կարող եմ բերել օրինակներ, որ խաղաղություն մուրալն է կատաստրոֆա»,- ասաց ՀՀԿ խոսնակը: Նա ասաց, որ մենք երկու պատերազմում հաղթել ենք, ուստի չի հասկանում՝ հիմա ինչո՞ւ պետք է Ադրբեջանից խաղաղություն մուրանք. «Մենք, իհարկե, փոխզիջումներին կողմ ենք եղել, բայց դա պետք է լինի հստակ. մենք դեմ ենք խաղաղություն՝ տարածքների դիմաց կոնցեպտին, ով ուզում է՝ դա առաջարկի՝ ՌԴ-ն, ԱՄՆ-ն, Եվրամիությունը, Ադրբեջանը, թե՞ Թուրքիան: Մեր նպատակը մեկը պետք է լինի՝ պաշտպանել 1991 թվականի դեկտեմբերի հանրաքվեի արդյունքները, իսկ այդ հանրաքվեով Արցախի ժողովուրդն «այո» է ասել անկախությանը: Հայաստանն այլ բան չունի անելու, քան պաշտպանել Արցախի ժողովրդի որոշումը»:

Մանրամասները՝ տեսանյութում

Աղավնի Սուքիասյան