Կառավարությունը դեռևս չի պատասխանել սպանված Իոսիֆ Աղաջանովի հարազատների նամակին

Կառավարությունը դեռևս չի պատասխանել Մհեր Ենոքյանի գործով տուժողներին՝ Աղաջանովների ընտանիքին: Հունվարի 24-ին լրագրողների հետ հանդիպմանն այս մասին տեղեկացրեց սպանված Իոսիֆ Աղաջանովի քույրը՝ Ելենա Աղաջանովան:

«Հունվարի 14-ին ցույց էինք կազմակերպել կառավարության շենքի առջև: Մոտ 300 մարդ էր հավաքվել, այդ թվում՝ հայտնի բժիշկներ, պրոֆեսորներ: Այդ նույն օրը մենք կառավարության ներկայացուցչին վարչապետին ուղղված հանդիպման խնդրանքով նամակ փոխանցեցինք, որպեսզի մարդասպանին ներելու հարցի մասին նրա տեսակետը լսենք: Մինչ օրս կառավարությունը չի արձագանքել՝ ո՛չ համաներման, ո՛չ հանդիպման մասով: Մի քանի օր անց հայրս նորից է դիմել վարչապետին, և նորից անարդյունք»,- ասաց Ելենա Աղաջանովան:

Նրա խոսքով՝ դիմել են նաև Արդարադատության նախարարություն. այստեղ օրենքներ են վկայակոչել և հրաժարվել են Մհեր Ենոքյանին ներելու հնարավորության մասին տեղեկություններ տրամադրել:

«Թեև մենք տուժող կողմ ենք ներկայացնում»,- հավելեց Իոսիֆ Աղաջանովի քույրը: Իրավաբան, Արցախի նախկին ՄԻՊ Ռուբեն Մելիքյանի պնդմամբ էլ՝ այն, որ Արդարադատության նախարարությունը հրաժարվում է տուժող կողմին պատասխանել, հակասում է ՄԻԵԴ-ի և ՄԱԿ-ի եվրոպական մոտեցմանը. այն ենթադրում է, որ տուժող կողմի կարծիքը պետք է հաշվի առնվի ծանր հանցագործությունների գործերի ժամանակ:

«Մեկ այլ ցմահ բանտարկված է Նաիրի Հունանյանը (1999թ. հոկտեմբերի 27-ի գործով – խմբ.): Եկեք պատկերացնենք, որ մի օր ահաբեկչության ժամանակ սպանվածների հարազատները փողոցում հանդիպում են Նաիրի Հունանյանին: Զարմանում են, իսկ նա պատասխանում է, որ պետությունն ինձ ներել է: Մոտավորապես նման բացատրություն է տրվում Մհեր Ենոքյանի գործով: Պաշտոնական պատասխաններից ստացվում է, որ իշխանությունները ոչ միայն պարտավոր չեն, այլև իրավունք չունեն ընտանիքին տեղեկացնելու»,- նշեց Մելիքյանը: