«Եթե իշխանությունն ունենար հնարավորություն ահաբեկչության հոդվածը ներառել «Սասնա ծռերի» մեղադրանքում, անպայման ներառած կլիներ»․ Անդրանիկ Քոչարյան

ՊՆ նախկին փոխնախարար, Ժողովրդավարության անվտանգության հայկական զարգացման կենտրոնի ղեկավար Անդրանիկ Քոչարյանը Factor.am-ի հետ զրույցում «առնվազն սխալ է» համարում «Սասնա ծռերի» գործողությունը ահաբեկչություն որակելը։

«Եթե իշխանությունը ունենար հնարավորություն ահաբեկչության հոդվածը ներառել մեղադրանքում, անպայման ներառած կլիներ, եթե չեն ներառել, նշանակում է՝ խանգարող հանգամանքները բավականին ուժեղ են եղել»,- ասաց Քոչարյանը՝ շարունակելով․ «Կարծում եմ՝ ահաբեկչության առկայությունը նաև հասարակությունը չընկալեց, որովհետև ահաբեկչություն բառը խոսում է այն մասին, որ հասարակությունը պետք է ինչ-որ չափով ահաբեկված լիներ, բայց այդ օրերին չեմ կարծում, որ մեր հասարակությունն ահաբեկված էր։ Ավելին՞ հասարակության մի հատված պաշտպանում էր «Սասնա ծռերի» գործողությունները և դրանում սկսեցին ներառվել նաև քաղաքական գործընթացներ»։

Անդրանիկ Քոչարյանը անհեթեթ է համարում նաև «Սասնա ծռերի» գործողությունների և հոկտեմբերի 27-ի սպանդի համեմատությունը։ «Բացարձակ նմանություն չկա հոկտեմբերի 27-ի և «Սասնա ծռերի» գործողությունների միջև։ Հոկտեմբերի 27-ին ոչ թե ահաբեկչություն է եղել, այլ եղել է պետական հեղաշրջում, իսկ hոկտեմբերի 27-ի գործողություններն իրանացրած խումբը այդ հեղաշրջման գործիքն է հանդիսացել։ Իսկ թե այդ հեղաշրջումն ինչ-որ այլ ուժերի կողմից իրականացվեց Հայաստանում, դա պետք է բացահայտեր քննությունը»,- ասաց ՊՆ նախկին փոխնախարարը։

Ըստ նրա՝ «Նաիրի Հունանյանի խումբը շատ լավ գիտեր, որ ինքը մտնում է պառլամենտ և սպանելու է Վազգեն Սարգսյանին և Կարեն Դեմիրճյանին, «Սասնա ծռերը» գրավել էին ոստիկանության պահպանության գունդը և իրենց գործողությունը իրենք ներկայացնում են որպես ապստամբության փորձ կամ հասարակությանն արթացնելու գործողություն»։

Փոխարենը, ըստ ՊՆ և ՆԳ նախկին փոխնախարարի, իշխանության կողմից ժողովրդի հանդեպ ահաբեկչություն էր մարտի 1-ը. «Այ 2008-ի մարտի 1-ին հասարակության մի ստվար հատված ահաբեկվեց»։

Մանրամասները դիտեք Factor.am-ի հետ ՊՆ նախկին փոխնախարար Անդրանիկ Քոչարյանի հարցազրույցում։

Մարինե Խառատյան