03.06.2026 | 23:39
ՌԴ-ն մտադիր է հայկական գյուղմթերքը փոխարինել Ադրբեջանից ներմուծումներով
Ոստիկանությունից հայտնել են՝ ինչու հուլիսի 17-ին չեն ապահովել «Սասնա ծռերի» աջակիցների երթի անվտանգությունը
Հասարակություն
04.08.2017 | 14:02
ՊՊԾ գնդի գրավումից մեկ տարի անց՝ հուլիսի 17-ին, Երևանում տեղի ունեցավ «Սասնա ծռեր» խմբի աջակիցների կազմակերպած հավաք-երթը՝ հաջակցություն խմբի անդամների: Այդ օրը հավաքի մասնակիցներն Ազատության հրապարակից երթով անցան մայրաքաղաքի մի շարք փողոցներով, այնուհետև կրկին վերադարձան Ազատության հրապարակ:
Չնայած երթն անցավ առանց որևէ միջադեպի, այնուամենայնիվ, ուշագրավ փաստ արձանագրվեց. ՀՀ ոստիկանության համապատասխան աշխատակիցները չապահովեցին երթի մասնակիցների անվտանգությունը: ՀՀ ոստիկանություն ուղարկված գրավոր հարցմամբ փորձեցինք պարզել՝ որն էր պատճառը, որ երթի մասնակիցների անվտանգությունը ոստիկանության աշխատակիցների կողմից չապահովվեց: Մեզ ուղարկված պատասխանում Ոստիկանությունից նախ հղում են արել «Հավաքների ազատության մասին» ՀՀ օրենքի 9-րդ հոդվածի 1-ին մասին, որի համաձայն՝ հանրային հավաք անցկացնելու համար կազմակերպիչը գրավոր իրազեկում է լիազոր մարմնին, բացառությամբ մինչ 100 մասնակից ունեցող, շտապ և ինքնաբուխ հավաքների: Ապա ընդգծել են, որ նույն օրենքի 27-րդ հոդվածի 1-ին մասի համաձայն՝ եթե ինքնաբուխ հավաքն ունի հավաքի անցկացման փաստացի կազմակերպիչ, ապա վերջինս պարտավոր է այդ մասին անհապաղ տեղեկացնել հավաքի անցկացման վայրի ոստիկանության ստորաբաժանմանը, իսկ նույն հոդվածի 2-րդ մասի համաձայն՝ շտապ հավաքի կազմակերպիչը պարտավոր է հավաքն անցկացնելուն ուղղված գործողություններ ձեռնարկելուց առաջ այդ մասին անհապաղ տեղեկացնել լիազոր մարմնին և ոստիկանությանը:
Բացի այդ, կրկին նույն օրենքի 32-րդ հոդվածի 1-ին մասի 1-ին կետի համաձայն ոստիկանությունը պարտավոր է հավաքի մասին տեղեկատվություն ստանալուց հետո անհապաղ նշանակել իր ներկայացուցչին և այդ մասին հայտնել կազմակերպչին և լիազոր մարմնին: Այսպիսով՝ ոստիկանությունից ընդգծում են, որ տվյալ դեպքում հավաքի կազմակերպիչը (փաստացի կազմակերպիչը) ոչ գրավոր, և ոչ էլ բանավոր ոստիկանությանը կամ լիազոր մարմնին չի տեղեկացրել կայանալիք հավաքի մասին, այդ իսկ պատճառով 2017թ. հուլիսի 17-ին կայացած հավաքի և երթի ընթացքում ՀՀ ոստիկանության կողմից չի ապահովվել հասարակական կարգն ու հասարակական անվտանգությունը:
Ուշագրավն այն է, որ Երևանում անցկացվող ցանկացած հավաք կամ երթ մշտապես ուղեկցվել է ոստիկանության ներկայացուցիչների մասնակցությամբ, ավելին՝ հաճախ ականատես ենք եղել, որ ոստիկանները թվով մի քանի անգամ գերազանցել են ցուցարարներին, և իհարկե, միշտ չէ, որ հավաքների կամ երթերի մասին համապատասխան մարմինները կազմակերպիչների կողմից նախապես իրազեկվել են:
Շողիկ Գալստյան
