«Զինվորական ծառայության և զինծառայողի կարգավիճակի մասին» օրենքների փաթեթը կհրապարակվի օրերս

ՀՀ պաշտպանության նախարարությունում ավարտական փուլում են գտնվում գործող «Զինվորական ծառայություն անցնելու մասին» և «Զինապարտության մասին» ՀՀ օրենքները միավորող «Զինվորական ծառայության և զինծառայողի կարգավիճակի մասին» ՀՀ օրենքի նախագծի մշակման աշխատանքները։ Այս մասին Factor.am-ի գրավոր հարցին ի պատասխան հայտնել են ՊՆ-ից։

Օգոստոսի առաջին տասնօրյակի ընթացքում նախատեսվում է նախագիծը շահագրգիռ պետական մարմինների քննարկմանը ներկայացնել և տեղադրել Արդարադատության նախարարության հանրային քննարկման միասնական կայքում:

Տեղեկացնենք, որ մենք հետաքրքրվել էինք, թե որ փուլում են վերոնշյալ օրենքների նախագծերի մշակման աշխատանքները, և հստակեցվել է արդյոք հիվանդությունների փոփոխված ցանկը, որով զինակոչիկը չի ազատվում պարտադիր զինվորական ծառայությունից։ ՊՆ-ից հայտնել են, որ նախարարի 08․04․2013 թվականի թիվ 410 հրամանի փոփոխությունների առնչությամբ նախագծի մշակման աշխատանքները դեռևս ընթացքի մեջ են։ Տեղեկացնենք, որ այս որոշումը վերաբերում է զինապարտների և զինծառայողների առողջական վիճակի փորձաքննությանը։

Հիշեցնենք, որ 27.11.2016-ին հեռարձակված «Ռ-էվուլյացիա» հաղորդման շրջանակներում պաշտպանության նախարար Վիգեն Սարգսյանը չէր բացառել հիվանդությունների ցանկի փոփոխությունը: «Շատ քիչ հիվանդություններ կան, որոնցով քաղաքացին բացարձակ պիտանի չէ ԶՈՒ-ին, իսկ բանակը պետք է ավելի շատ ջանք դնի և գտնի այն պայմանները, որտեղ սահմանափակ կարողություններով քաղաքացին կարող է իր օգտակար ծառայությունը բերել»,- ասել էր Վիգեն Սարգսյանը։

Սեդա Ղուկասյան