02.04.2026 | 19:22
Փաշինյանը ներկա է եղել միջնադարյան գլուխգործոցի՝ հայկական եկեղեցու փայտյա դռան փեղկի ցուցադրությանը
ՀՀ ԱԺ պատգամավորները Ակնալճում հարգանքի տուրք են մատուցել եզդի զոհերի հիշատակին
03.08.2017 | 17:59
Օգոստոսի 3-ին ՀՀ ԱԺ պատգամավորներն այցելել են Արմավիրի մարզի Ակնալիճ գյուղում գտնվող եզդիական սրբատեղի և հարգանքի տուրք մատուցել 2014 թվականի օգոստոսի 3-ին «Իսլամական պետության» կողմից Իրաքի Հանրապետության Շանգալ եզդիաբնակ նահանգում իրականացված ոճրագործության շուրջ 12 հազար անմեղ եզդի զոհերի հիշատակին:
Ինչպես տեղեկացնում են ԱԺ լրատվության և հասարակայնության հետ կապերի վարչությունից, ներկաները ծաղիկներ են դրել հուշակոթողին, այնուհետև այցելել են եզդիական տաճար: ՀՀ ԱԺ նախագահի տեղակալ Արփինե Հովհաննիսյանը լրագրողների հետ ճեպազրույցում նշել է, որ այն, ինչ տեղի է ունեցել Իրաքի հյուսիսում եզդիների նկատմամբ, դա ցեղասպանություն էր:
Խոսելով ՀՀ Ազգային ժողովի կողմից ցեղասպանություն եզրույթի ընդունման մասին՝ ՀՀ ԱԺ փոխնախագահն ասել է. «Յուրաքանչյուր պետություն հաշվի է առնում գործընթացի շրջանակներում կոնկրետ քայլերի հաջորդականությունը և արտաքին քաղաքական օրակարգի առաջնահերթությունների շրջանակում հարցին քայլ առ քայլ գնալը, դա մեկ րոպեի կամ մեկ ժամվա գործընթաց չէ»:
ՀՀ ԱԺ պատգամավոր, եզդի համայնքի ներկայացուցիչ Ռուստամ Մախմուդյանը նշել է, որ ՀՀ խորհրդարանը սկզբունքորեն դեմ չէ և հակված է 2014 թվականի օգոստոսի 3-ին Իրաքում եզդիների նկատմամբ կատարված ցեղասպանության վերաբերյալ որևէ ձևաչափով փաստաթղթի ընդունմանը:
