«Նենց որ՝ քիչ ծխեք». կառավարությունը հաստատեց ծխելու դեմ պայքարի ռազմավարությունը

ՀՀ կառավարության այսօրվա նիստին Առողջապահության նախարար Լևոն Ալթունյանը ներկայացրեց ծխելու դեմ պայքարի ռազմավարությունը և այդ ռազմավարության 2017-2020 թվականների միջոցառումների ծրագրին հավանություն տալու մասին որոշման նախագիծ:

Նախագիծը գործադիրի անդամներին ներկայացնող նախարարն ասաց՝ ռազմավարության ներդրման նպատակն է միջոցներ իրականացնել` ուղղված Հայաստանի Հանրապետությունում ծխախոտի օգտագործման, սպառման նվազեցմանը, պահպանել բնակչության առողջությունը` պաշտպանելով ծխախոտի ծխի երկրորդային ազդեցությունից և նվազեցնել ոչ վարակիչ հիվանդությունների ցուցանիշները` կրճատելով ծխախոտի օգտագործումը:

Ըստ նախարարի՝ ռազմավարությունը նախատեսվում է իրականացնել հետևյալ ուղղություններով՝

Հայաստանի Հանրապետությունում ծխելու դեմ պայքարի ուղղությամբ բոլոր շահագրգիռ կողմերի ակտիվ համագործակցության իրականացում,

ծխելու դեմ պայքարին ուղղված գործող օրենսդրական դաշտի վերանայում և լրամշակում,

ծխելու դեմ պայքարին ուղղված գործունեություն իրականացնող առողջապահական կազմակերպությունների կարողությունների զարգացում,

դեռահասների շրջանում ծխելու դեմ ուղղված միջոցառումների իրականացում,

Հայաստանի Հանրապետությունում ծխախոտի օգտագործման հետևանքով առողջությանը հասցված վնասների տվյալների ու մասշտաբների վերլուծության, հիմնական գործոնների, պատճառների բացահայտման և համաճարակաբանական հսկողության արդյունավետ գործընթացի իրականացում,

ծխախոտի օգտագործման հետևանքով առաջացած վնասների և հետևանքների վերաբերյալ հանրության իրազեկվածության մակարդակի բարձրացում:

«Նախագծում նշված է, որ ռազմավարությամբ իրականացվող միջոցառումներն իրականացվելու է մեկ փուլով, 2017-2020 թվականների ընթացքում ակնկալվող հետևյալ արդյունքներով՝ ծխախոտի օգտագործման տարածվածության (տարեկան 1,5-2 %-ով) նվազեցում, 15 և բարձր տարիքի տղամարդկանց շրջանում ծխախոտի օգտագործման տարածվածության ընթացիկ ցուցանիշի հարաբերական կրճատում մինչև 10%-ով: Երկրորդային ծխի ազդեցության նվազեցում, որը կնպաստի արյան շրջանառության համակարգի հիվանդություններից, չարորակ նորագոյացություններից, թոքերի քրոնիկ օբստրուկտիվ հիվանդություններից և շաքարային դիաբետից ընդհանուր և վաղաժամ մահացության կրճատում 5%-ով»,- եզրափակեց առողջապահության նախարարը:

Վարչապետ Կարեն Կարապետյանն էլ արձագանքեց. «Նենց որ՝ քիչ ծխեք»:

Շողիկ Գալստյան