Երևանում հուլիսի 27-ին շենքի 2-րդ հարկի պատշգամբից ընկած 2 տարեկան տղայի առողջական վիճակում դրական տեղաշարժ կա: Այս մասին Factor.am-ին հայտնեց Երևանի «Սուրբ Աստվածամայր» բժշկական կենտրոնի վերակենդանացման բաժանմունքի վարիչ Աննա Չոբանյանը:
«Փոքրիկն այսօր երկրորդ անգամ վիրահատվել է, առաջին անգամ ձեռքի կոտրվածքի համար է վիրահատվել, ակնակապիճի ոսկորն էլ գիտեինք՝ կոտրված է, բայց հետաձգում էինք մինչև ուղեղի վիճակը լավանա, այսօր, ի վերջո, վիրահատեցին»,- նշեց բաժնի վարիչը՝ հավելելով, որ վիրահատությունն անցել է նորմալ:
Հիշեցնենք՝ հուլիսի 27-ին արտակարգ դեպք է տեղի ունեցել Երևանում: Ժամը 14:40-ի սահմաններում «Սուրբ Աստվածամայր» բժշկական կենտրոնից Ոստիկանության Երևան քաղաքի վարչության օպերատիվ կառավարման կենտրոն հայտնել են, որ «պոլիտրավմա» ախտորոշմամբ իրենց մոտ է տեղափոխվել մի երեխա: Փոքրիկը հիվանդանոց է տեղափոխվել Ավան վարչական շրջանի Ծարավ աղբյուր փողոցի տներից մեկից:
Պարզվել է, որ նշված տան 2-րդ հարկի պատշգամբի մոտ երեխայի՝ 2-ամյա է. Շ-ի տատիկը՝ 54-ամյա Ա. Ս.-ն, օրորելու ժամանակ երեխային գրկից անզգուշաբար պատշգամբից գցել է:
Factor.am-ի հարցին՝ միջադեպի հետևանքով հետագայում փոքրիկն առողջական ի՞նչ խնդիրներ կարող է ունենալ, բաժանմունքի վարիչը պատաասխանեց. «Հիմա դժվար է ասել, բայց եթե ամեն ինչ լավ ընթանա, հնարավոր է՝ ոչ մի հետևանք էլ չլինի: Ամեն ինչ կախված է բուժման ընթացքից և փոքրիկի օրգանիզմից»:
Ըստ Չոբանյանի՝ մինչ այժմ երեխայի բուժումն ընթանում է առանց բարդությունների, իսկ այլ վիրահատության կարիք չկա:
Շողիկ Գալստյան
